«Jyl saıyn qyrkúıek-qarasha aralyǵynda emhanaǵa tirkeý naýqany ótkiziledi. Sońǵy eki jylda dástúrli kampanııany Medısınalyq saqtandyrý qory ótkizdi. Jalpy, biz turǵyndardy úıge jaqyn mańdaǵy emhanaǵa tirkelýge shaqyramyz. Onyń bir sebebi osy jedel járdemge baılanysty. Birinshiden, bul úıde kishkentaı bala nemese qart kisiler aýyryp qalǵan jaǵdaıda dáriger shaqyrýǵa yńǵaıly. Ekinshiden, jedel járdem salasyndaǵy sońǵy reformalarǵa baılanysty 4-shi sanattaǵy shaqyrtýlar boıynsha jergilikti emhanalar qyzmet kórsetedi», - deıdi «Áleýmettik medısınalyq saqtandyrý qory» KEAQ basqarýshy dırektory Zabıra Orazalıeva.
Esterińizge sala ketsek, ótken jyly Densaýlyq saqtaý mınıstrligi jedel járdem júıesin reformalaýǵa kirisken bolatyn. Atalǵan reforma boıynsha jedeldigi jaǵynan 4-shi sanatqa jatatyn shaqyrtýlar jergilikti emhanalarǵa berildi. Bul týraly tolyq málimetti Medısınalyq saqtandyrý qory daıyndaǵan ınfografıkalardan alýǵa bolady.