2018 jyldyń 1 qańtarynan bastap Qazaqstan plastmassadan, qaldyqtardan, kartonnan, qaǵaz qaldyqtarynan jáne polıgondardaǵy áınekterdi saqtaýǵa tyıym saldy. Osyǵan baılanysty Qazaqstan Respýblıkasy Energetıka mınıstrligi ákimdiktermen birlesip shaǵyn jáne orta bıznesti keńinen damyta otyryp, turmystyq qatty qaldyqtardy (TQQ) zamanaýı kádege jaratý jáne óńdeý boıynsha sharalar keshenin ázirledi. Atyraýda jergilikti bılik qoqys jınaý máselesin utymdy sheshýge sheshim qabyldady, jaqyn arada oblys ortalyǵynda belorýssııalyq quraldarmen jabdyqtalǵan qaldyqtardy suryptaý kesheni iske qosylady. Munaı kapıtaly úshin jańa joǵary tehnologııalyq suryptaý keshenin iske qosý aǵymdaǵy jyldyń mamyr aıyna josparlanǵan.
- Keshen jeke ınvestor esebinen Belorýssııadaǵy «Sıfanııa - Ekotehnıka» kompanııasynan satyp alynady. Kompanııa TMD elderine jáne Eýropalyq Odaqqa qaldyqtardy qaıta óńdeý jabdyqtaryn jetkizedi. Mundaı jabdyq Qostanaı, Jańaózen jáne Aqtaý qalalarynda jumys istep jatyr. Bul zaýytty tańdaýda Mańǵystaý men Atyraýdyń uqsas klımattyq jaǵdaılary jáne tuzdy topyraǵy mańyzdy ról atqardy, - dedi «Arnaýly avtobaza» JShS dırektory Almas Iztileýov.
Atyraýda suryptaý keshenimen qatar, plastıkalyq qaldyqtardy qaıta óńdeý sehy iske qosylady. Búgingi tańda qural-jabdyqtardyń bir bóligi alyndy, turaq jaı jóndeldi.
- Jabdyqtardy jetkizý belorýssııalyq mekeme tarapymen jasalǵan shartqa sáıkes júzege asyrylady. Keshendi jabdyqtaý, ony ornatý, montajdaý jáne iske qosý óndirýshi tarabynan júrgiziledi. Synaq nusqasy bıyl jazdyń basyna josparlanyp otyr. Keshen 1000 sharshy metr aýmaqta polıgonnyń janynda ornalasady, - dep málimdedi «Arnaýly avtobaza» JShS dırektory.
Qaladaǵy qoqys polıgonyna kún saıyn 250-300 tonna qatty qaldyqtar jetkiziledi. Satyp alynatyn jabdyqtar jylyna 100 myń tonna mýnısıpaldyq qatty qaldyqtardy suryptaýǵa arnalǵan. Jalpy keshen 70-ke jýyq jumys ornyn ashýǵa múmkindik beredi.