Biryńǵaı jınaqtaýshy zeınetaqy qory turǵyndar arasynda aqparat berý-túsindirý jumystaryn jalǵastyryp keledi. Osy jumystar aıasynda salymshylar men alýshylarǵa zeınetaqy júıesine qatysty mańyzdy suraqtar boıynsha turaqty túrde aqparat berilip jatyr. Atalmysh sharanyń taqyryby – zeınetaqy zańnamasyna engizilgen ózgerister.
«Zeınetaqy júıesin jańǵyrtýdaǵy basty maqsat – zeınetaqy tólemderiniń tıimdiligin arttyrý. Azamattyq-quqyqtyq sıpattaǵy sharttar boıynsha jumystar men qyzmetter atqaratyn jeke tulǵalardyń mindetti zeınetaqy jarnalaryn tóleý rásimin ońaılatý maqsatynda zeınetaqy zańnamasyna mynadaı ózgerister engizildi: eger azamattyq-quqyqtyq sıpattaǵy sharttardyń bir taraby salyq agenti bolsa, jeke tulǵalarǵa, olardyń ishinde frılanserlerge beriletin tabystan mindetti zeınetaqy jarnalaryn osy salyq agenti tóleıtin bolady; eger azamattyq-quqyqtyq sıpattaǵy shart jeke tulǵamen jasalǵan bolsa, mindetti zeınetaqy jarnalaryn tóleý – frılanserdiń mindeti emes, quqyǵy bolyp tabylady; eger jeke tulǵa jaldamaly jumysshy bolsa jáne azamattyq-quqyqtyq sıpattaǵy shartty salyq agenti bolyp tabylmaıtyn jeke tulǵamen jasasa, onda osy shart boıynsha mindetti zeınetaqy jarnalaryn tóleý – onyń mindeti bolyp eseptelmeıdi», – delingen qordyń baspasóz qyzmeti taratqan habarlamada.
Bul rette jarnalardy esepteý úshin alynatyn eń joǵary jıyntyq jyldyq tabys respýblıkalyq bıýdjet týraly zańmen tıisti qarjy jylyna belgilengen eń tómengi jalaqynyń 50 eselengen mólsheriniń 12 eselengen somasynan aspaýy tıis. Bıyl engizilgen ózgeristerdiń biri – jeke zeınetaqy shottarynyń avtomatty túrde ashylýy. Dálirek aıtqanda, 2019 jyldyń 8 qańtarynan bastap jeke tulǵaǵa mindetti zeınetaqy jarnalary boıynsha shot ashý úshin Qorǵa júginýdiń qajeti joq. Jeke tulǵanyń Qorda mindetti zeınetaqy jarnalaryn esepke alý boıynsha shoty joq bolsa, onda alǵashqy jarna túsken sátte shot avtomatty túrde ashylady.
2019 jyldyń 1 qańtarynan bastap elimizde Biryńǵaı jıyntyq tólem (BJT) iske qosyldy. Sol arqyly memlekettik kirister organyna tólenetin jeke tabys salyǵy, BJZQ-ǵa tólenetin mindetti zeınetaqy jarnalary, memlekettik áleýmettik saqtandyrý qoryna tólenetin áleýmettik aýdarym, mindetti áleýmettik medısınalyq saqtandyrý qoryna tólenetin áleýmettik jarna sııaq tórt tólemdi qatarynan júzege asyrýǵa bolady. Budan bólek, 2019 jyldyń 25 qańtarynan bastap jeke zeınetaqy shotynyń jaı-kúıi týraly aqparatty elektrondyq úkimet portaly arqyly alý ońaı bola tústi. Osy kúnnen bastap kez kelgen salymshy (alýshy) jeke zeınetaqy shotynan úzindi kóshirmeni tek elektrondyq sıfrlyq qoltańba ǵana emes, bir rettik sms-paroldiń kómegimen de ala alatyn boldy. Bul úshin salymshy (alýshy) elektrondyq úkimet portalynyń jeke kabınetinde tirkelip, úzindi kóshirme alýǵa saýal joldaıdy. Sodan keıin mGov mobıldik azamattar bazasynda tirkelgen salymshynyń (alýshynyń) uıaly telefonyna bir rettik sms-parol jiberiledi.
2019 jyldyń aqpanynda «E-notarıat» júıesi men BJZQ aqparattyq júıesiniń ózara yqpaldastyǵy júzege asyryldy. Endi notarıýstar «E-notarıat» Biryńǵaı notarıaldyq aqparattyq júıesi arqyly ózderiniń óndirisindegi muragerlik ister boıynsha (muragerler ótinish bergen jaǵdaıda) qaıtys bolǵan salymshylardyń (alýshylardyń) Qorda jeke zeınetaqy shotynyń jáne onda aqshanyń bolýy týraly BJZQ-ǵa onlaın tártibinde (hat júzinde saýaldar joldamastan) saýaldar joldaı alady.
Qandaı da bir sebeptermen Ashyq esik kúnine kele almaǵandar zeınetaqymen qamsyzdandyrý máseleleri boıynsha Qordyń www.enpf.kz saıty arqyly Basqarma Tóraıymynyń blogyna suraq qoıýǵa, baılanys ortalyǵynyń 1418 telefon nómirine qońyraý shalýǵa (Qazaqstan boıynsha qalalyq jáne uıaly telefon arqyly habarlasý tegin) bolady. Sonymen qatar salymshylar men alýshylar óz ótinishterin Qordyń áleýmettik jelilerdegi negizgi paraqshalary jáne WhatsApp arnasy arqyly joldaı alady.