Májilis Tóraǵasy Nurlan Nyǵmatýlın birneshe elder parlamentteriniń spıkerlerimen ótkizgen kezdesýlerde keıingi kezde Qazaqstanda bolǵan ózgerister týraly áńgimelegende olardyń bári de bizdegi konstıtýsııalyq talaptyń saqtalýy, bıliktiń quqyqty memleketke tán, órkenıetti sıpatta aýysýy jaıynda razylyqpen aıtqanyna, Elbasynyń ishki jáne syrtqy saıasatynyń sabaqtastyǵy saqtalatynyna kóńilderi tolatynyna qýandyq. Munyń ózi eldegi saıası mádenıettiń bıik deńgeıin tanytatynyna, dúıim dúnıege memleketimizdiń jaqsy atyn shyǵaratynyna taǵy da kóz jetkize tústik. Elge oralysymen eldiktiń kezekti kelisti kórinisine kýá boldyq. Táýbe dedik.
Prezıdent Qasym-Jomart Toqaevtyń keshegi sheshimi – el kútken sheshim. Demin ishine alyp kútip otyrǵan halyqtyń kóńilin kúpti ete bermeý, jan-jaqtan janar qadaǵan syrt kózdi sabasyna túsirý kerek edi. Onyń jalǵyz joly, senimdi joly – Prezıdent saılaýyn kezekten tys ótkizý ekenin jurttyń bári de bilip otyrǵan edi. Bar másele saılaýdyń qaı kezge belgilenetinine ǵana baılanysty bolatyn. Ol jaǵdaı da aıqyndaldy. Qazaqstan Respýblıkasynyń Prezıdentin kezekten tys saılaý 2019 jylǵy 9 maýsymda ótetini resmı jarııa etildi. Ony Memleket basshysy óz betinshe, jeke-dara sheshken joq. Elbasymen aqyldasty. Parlament palatalarynyń basshylyǵymen, Konstıtýsııalyq Keńespen, saıası partııalar jetekshilerimen keńesti. Sóıtip baryp el taǵdyryna qatysty sheshim jóninde bir toqtamǵa keldi. Qazaqstan azamattaryna arnaǵan Úndeýinde el Prezıdentin saılaýdy nelikten kezekten tys ótkizý kerektigin negizdedi. Aıtqanynyń bári de kókeıge qonymdy. Qoǵamdyq-saıası kelisimdi qamtamasyz etý, alǵa qaraı senimdi jyljý, áleýmettik-ekonomıkalyq damý mindetterin sheshý úshin bizge anyqtyq, aıqyndyq, ashyqtyq kerek. Onyń ústine álemdegi ahýal da bultań-bultań etip, halyqaralyq saıasattyń aýa raıy bulyńǵyr bolyp turǵany taǵy bar. Al bul el qaýipsizdigine tikeleı qatysty jaıt. Osyndaıda bılik tranzıtiniń ýaqytyn sozyp almaý – óte mańyzdy. Máseleniń basyn tez ashyp, memleketti damytýdyń jańa kezeńin birden bastap ketý kerek. Halyqtyń tańdaýymen, eldiń tikeleı erkimen saılanǵan basshynyń ózi de, sózi de salmaqtyraq bolatynyn aıtyp jatý artyq. Jyrǵalyp júretin jaǵdaı joq. Uly Dala eliniń uly mejege umtylǵan ulan-ǵaıyr kóshi kidirmeýi kerek.
Saýytbek ABDRAHMANOV,
Májilis depýtaty