«Otandastar Qory» KEAQ Prezıdentiniń keńesshisi Maǵaýııa Sarbasov óz sózinde kezdesýdi uıymdastyrǵan Qazaqstannyń Fransııadaǵy ókiletti elshisi Jan Ǵalıev myrzaǵa jáne elshilik ujymyna alǵysyn bildirip, Qor qyzmetiniń jalpy ustanymy men jospar-jobalaryna toqtaldy.
«Qazaq eli Táýelsizdik jyldarynda alystaǵy aǵaıynǵa qoldaý kórsetýdi esten shyǵarǵan emes. Elbasy tapsyrmasymen qurylǵan «Otandastar Qory» sonyń aıqyn dáleli. Qor elge oralǵan qandastarmen birge, sheteldegi qazaq dıasporasyn qoldaý baǵytynda jumys isteıdi. Ol, óz kezeginde, jyraqtaǵy otandastarymyzdyń quqyǵyn qorǵaý, mádenı jáne zııatkerlik áleýetin saqtaý, qazaq dıasporasymen mádenı, iskerlik jáne basqa da baılanystardy nyǵaıtý, sondaı-aq tarıhı otanǵa oralýǵa nıetti qandastarǵa qolaıly jaǵdaı jasaý syndy maqsattardy qamtıdy», - dedi Maǵaýııa Sarbasov.
Kezdesý barysynda qandastarymyz kókeıtesti máselelerin jetkizip, Qor ókilderinen olardyń sheshilý jolyn qarastyrýyn ótindi. Máselen, Mustafa Shoqaı atyndaǵy qazaq-fransýz «Dostyq» qoǵamynyń tóraǵasy Iаshar Dınch myrzanyń aıtýynsha, Fransııadaǵy qazaq qoǵamyna latyn qarpindegi qazaq kitaptary men qazaq-fransýz sózdikteri aýadaı qajet. Týǵan tilin meńgerýge nıetti qandastarymyz Qazaqstannyń jaqyn kúnderi tolyǵymen latyn qarpine ótetindigine, sondaı-aq jyraqtaǵy qazaqqa qoldaý kórsetýge baǵyttalǵan «Otandastar Qorynyń» qurylǵanyna rızashylyq bildirdi.
Fransııaǵa issapary aıasynda Qor ókilderi qazaq dıasporasynyń Ulystyń Uly kúni Naýryz dýmanyna, Fransııadaǵy etnıkalyq qazaqtardyń qurama komandasy oınaǵan fýtbol lıgasyna qatysyp, Parıjdegi Mustafa Shoqaıdyń eskertkishine baryp, gúl shoqtaryn qoıdy. Sondaı-aq, «Qorqyt» tuńǵysh qazaq mádenıet ortalyǵynyń jumysymen tanysyp qaıtty.
Sonymen qatar, Qor ókilderi Fransııadaǵy asyrandy qazaq balalarynyń otbasy jaǵdaıymen tanysyp, olardyń qazaq tilin, mádenıetin, tarıhyn meńgerý múmkindikteri jaıly bilip qaıtty.