Qazir jasandy kóldegi balyqtardyń jappaı qyrylý sebebi anyqtaldy. Apatty jaǵdaı aýyl aýmaǵynan ótetin Almaty qalasynyń káriz júıesinen shyqqan aqaýdan keıin bastalǵan. Jasandy kól mańyndaǵy jaıylǵan las sýdy aldymen turǵyndar baıqap, tıisti oryndarǵa habarlaǵan. Qubyrdy buzyp-jarǵan qaldyq jerge sińip, balyq sharýashylyǵynyń sý qoımasyna baryp qosylǵan bolýy kerek.
- Biz turǵan aýyldyń astynan qaladan shyǵatyn barlyq qaldyq sý aǵyp ótedi eken. О́tken jyldan beri «Birinshi maı» aýyly men Qoıanqus aýyldarynyń tusyndaǵy káriz júıesin aýystyrý jumysy júrýde. Aýmaqty túgel qazyp, úlken qubyrlardyń birin alyp, birin kómip jatyr. Osy kómilgen qubyrlardan qaldyq sý aǵyp ketken bolýy kerek. Ol jasandy kólge quıylyp, onda ósip jatqan balyqtardy ýlaǵan. Ákimdiktegiler aınalaǵa zııany joq deıdi, biraq jaqyn mańnan jaǵymsyz ıis shyǵady. Ásirese, qyrylǵan balyqtyń saýdaǵa shyǵyp ketýinen qaýiptenemiz, - deıdi «Birinshi maı» aýylynyń turǵyndary.
Aýdan aýmaǵyndaǵy balyq sharýashylyǵynda bolǵan apatty oqıǵany Ile aýdanynyń ákimdigi rastady. Qazirgi kezde jasandy kóldegi balyqtardyń qyrylý sebebi naqtylandy. Oqıǵa ornyna barǵan arnaıy komıssııa kól sýynyń quramynda mólsherden tys amıak qospasy men adam záriniń ýly tunbasyn anyqtap, ol káriz júıesinen shyqqan aqaý arqyly kólge quıylǵan degen sheshim shyǵarǵan.
- Jasandy kóldi «Bent» aksıonerlik qoǵamy jalǵa alyp, balyq sharýashylyǵymen aınalysýda. Aýdannyń tıisti sala mamandary oqıǵa orynyna dereý baryp, jaǵdaımen tanysty. Turǵyndardyń ómirine qaýip tóngen joq.Ýlanyp qyrylǵan balyqtar joıyldy. Keltirilgen shyǵyn boıynsha Almaty qalasynyń tıisti qyzmetine shaǵym joldanatyn bolady, - dedi bizge jaǵdaıdy túsindirgen Ile aýdany ákiminiń baspasóz hatshysy Baqtııar Talǵatuly.
Al jasandy kólde qyrylyǵan balyq túrleriniń saýdaǵa shyǵyp ketýi jaıly aqparat rastalmady. Qazir ekolog mamandardyń tekserýinen ótken balyq óleksesi tolyqtaı jınalyp alyndy.
- 2 tonnaǵa jýyq balyq óleksesin súzip, joıýǵa jiberdik. Balyq sharýashylyǵynyń uzaq merzimdegi eńbegi zaıa boldy. Bul jerde negizinen tuqym shashatyn balyqtar ósetin edi, túgel qyryldy. Endi Almaty qalasynyń kommýnnaldyq qyzmetiniń ústinen sotqa shaǵymdanamyz, - dedi «Bent» seriktestiginiń ókili A. Kýzıeva.
Málim bolǵan derek boıynsha, qala mańyndaǵy jasandy kólderde iri kólemde balyq túrleri ósiriledi. Onyń ishinde «Bent» seriktestigi 278 gektar aýmaqta balyq sharýashlyǵymen aınalysady. Baǵymdaǵy balyqtardy Almaty qalasy boıynsha tamaq ónerkásibi salasy tutynady. Sazan, karp, alabuǵa sııaqty balyq túrlerine jurtshylyqtan suranys kóp túsedi eken.