Djýlıan Assanj 2012 jyldan beri Ekvadordyń Londondaǵy elshiliginde tyǵylyp kelgen edi. Oǵan Shvesııa tarapy jynystyq qarym-qatynasqa túsýge kúshtedi dep aıyp taqqan-tuǵyn. Sondaı-aq Ulybrıtanııa Assanjdy tutqyndaýǵa sheshim qabyldaǵan bolatyn. Keıinirek Shvesııa oǵan taǵylǵan aıypty negizsiz dep tapqan. Áıtse de, Brıtan koroldigi ony qamaýǵa alý týraly sheshimdi ózgertken joq.
«Assanj Londonnyń ortalyq polısııa ýchaskesine ákelindi. Ol Vestmınster magıstrattyq sotynyń aldyna barǵansha sonda bolady», dep málimdedi Metropolıtan polısııasy.
О́z kezeginde Ekvador prezıdenti Lenın Moreno týıtterdegi paraqshasynda nelikten Djýlıan Assanjdy bosqyn retinde tanýdan bas tartqanyn túsindirdi.
«Djýlıan Assanj halyqaralyq konvensııa men kúndelikti protokoldy qaıta-qaıta buzǵany úshin derbes sheshim retinde Ekvador oǵan bosqyn mártebesin berýden bas tartty», dep jazdy ol.
The Guardian basylymynyń málimetine súıensek, osydan eki aı buryn Wikileaks saıtynda Ekvador prezıdenti Lenın Moreno men onyń otbasynyń sybaılas jemqorlyqqa, kúshtep aqsha tartyp alýǵa qatysy bar ekeni jarııalanǵan. Sondaı-aq jeke sýretterin de taratqan. Alaıda el prezıdenti taǵylǵan aıyptardy joqqa shyǵardy.
Wikileaks saıty 2006 jyly qurylǵan bolatyn. Sodan beri onda jasyryn aqparat berýshilerden alynǵan qupııa qujattar jarııalanyp keledi. Ásirese, 2010 jyly Iraktaǵy jáne Aýǵanstandaǵy AQSh-tyń áskerı operasııalary týraly qujattar álemdi dúr silkindirdi. Budan bólek, Gýantanamo túrmesindegi jaǵdaı týraly málimeti de álem nazaryn aýdardy.