Qostanaı óńiriniń Atymtaı-jomarttarynan quralǵan osy uıym qurylǵan 19 jyldan beri 248 mıllıon teńgeni quraǵan 477 syılyq belgilenip, ony oblys óńirindegi óner, mádenıet, ǵylym, jýrnalıstıka, taǵy basqa áleýmettik salalardaǵy 498 talanttar men úzdik eńbek ıeleri jáne 41 ujym alypty. Ol syılyqty alǵandardyń arasynda kóziniń tirisinde belgili satırık jazýshy, enograf Seıit Kenjeahmetov bar edi. Sonymen qatar aıtysker aqyn Ásııa Berkenova, tarıhshy ǵalym Amanjol Kúzembaıuly, aqyn Aqylbek Shaıahmet, ólketanýshy Shóptibaı Baıbildın , kompozıtor Qalıbek Derbsaldın, sýretshiler Gergıı Sokov, Nıkolaı Torshın, taǵy basqalar boldy.
«Mesenattar klýbynyń» qyzmeti búginde «Rýhanı jańǵyrý» baǵdarlamasyn júzege asyrýdaǵy «Týǵan jer» jobasynyń aıasynda tereń mazmunmen baıı tústi. Osy bedeldi saltanatty shara ótkizilip otyrǵan Jastar saraıy da Atymtaı-jomarttar – demeýshilerdiń arqasynda salynǵan bolatyn. Mesenattar qanshama áleýmettik jaǵynan áljýaz otbasylaryna, jetim balalarǵa kómektesti, bıyldyń ózinde berneshe kóp balaly otbasylaryna baspana alyp berdi. Qysqasy, «Mesenattar klýby» qazir Qostanaı oblysynyń atyn asqaqtatatyn aıdarly isteriniń birine aınaldy» dedi Arhımed Begejanuly.
Bıyl «Mesenattar klýbynyń» «Qazyna» men jastarǵa arnalǵan «Shabyt» syılyǵy 13 atalym boıynsha ıelerin tapty. Onyń ishinde «Teatr», «Ádebıet», «Ǵylym», «Vokal», «Mýzyka», «Horeografııa», «Jıvopıs», «Aýyl janashyry», «Jýrnalıstıka» sııaqty atalymdar bar. Mysaly, bıyl «Ádebıet» atalymy boıynsha «Qazyna» syılyǵyn aqyn Naǵashybaı Muqatov, aýdarmashy Ábdirahman Dosovpen qatar, elimizdegi saýsaqpen sanarlyqtaı satırık áıelderdiń biri Kúlásh Baıdaly da aldy. Kúlásh bul syılyqqa ádebıet pen jýrnalıstıkada etken kóp jylǵy eńbeginiń syrtynda, jaqynda ǵana jaryq kórgen «Ury oı» atty kitaby úshin ıe boldy.
«Mesenattarǵa rahmet! Shyǵarmashylyqpen aınalysqan adamdardyń qaltasy eshqashan qalyń bolǵan emes. Áleýmettik jaǵynan qoldaýdy kerek etetinimiz ras. Meniń qolyma tıetinqomaqty qarjyǵa men bolashaq kitabymdy shaǵaramyn, densaýlyǵymdy túzeımin. Jaqsy emes pe?» deıdi Kúlásh qýanyshyn jasyra almaı. Sonymen qatar qýanysh ıeleriniń qatarynda jas ǵalym Indıra Beıisheva , teatr rejısseri Álııa Sadyqova, qobyzshy Nazgúl Moljahmetova, pedagog-horeograf Iýlııa Pınjenına, «Mádenı mura» atalymy boıynsha Uly Otan soǵysynyń ardageri Pavel Dasenko, aldynan talaı mýzykant túlep ushqan pedagog Erkin Qojahmetov, jas jýrnalıst-qalamgerler Qýanysh Esqabylov, Asylan Qanǵjoın taǵy basqalar bar.
Mine, osyndaı syılyqtar qyryqqa jýyq úzdikterge tapsyryldy. Saltanatty sharanyń sońy úlken konsertke ulasty.