Qylmysty ishki memlekettik aýdıt departamenti áshkerelegen. Bir qyzyǵy, bas esepshiniń 9,2 mln teńgeni qaltasyna basqany jaıly eshkim shaǵymdanbaǵan. Tek bir adamnyń ǵana aryzdanýǵa batyly jetken.
«Kúdikti zańǵa qaıshy áreketter jasaýmen qatar eńbek, salyq, bıýdjet zańnamalaryn da óreskel buzǵan. Salyqtardy tólemegen, tárbıeshilerdiń atyna zeınetaqy aýdarymdaryn jasamaǵan», deıdi ishki memlekettik aýdıt departamenti basshysynyń orynbasary Záýresh Qaparova.
Qarjyny jymqyrý faktileri Aıyrtaý aýdanynyń bilim bóliminde de tirkelgen. Saýmalkól mektep-ınternatynyń shatyryna bólingen qarajatty áldekimder pyshaq ústi bólip alǵan.
Tek bıyldyń ózinde 26 laýazymdy tulǵaǵa tártiptik, osynsha adamǵa ákimshilik shara kórilgen. Pysyqaılar 31 mıllıon teńgeni qymqyryp, bıýdjettiń tý-talaqaıyn shyǵarǵan.
Departamenttiń bólim jetekshisi Erdos Bagenovtyń aıtýynsha, kameraldyq baqylaý júıesi boıynsha jıyntyq quny 82 mıllıard teńgeniń 25 000 loty tekserilip, 12 mıllıard teńgeniń zań buzýshylyǵy anyqtalǵan. Konkýrsty uıymdastyrýshylar qý qulqynnyń qamy úshin nebir quıtyrqy áreketterge arlanbastan barady eken. Zań talaptary men sharttardy keri syryp tastap, ózderi oılap tapqan «erejemen» jumys isteıtin kórinedi. Basy artyq qujattar suratyp, áýre-sarsańǵa salyp qoıatyn mysaldar da az kezdespeıdi.
Soltústik Qazaqstan oblysy