Qazaqstannyń ulttyq quramasy Azııa chempıonatynda alǵash ret 1993 jyly boı kórsetti. Japonııanyń Hırosıma qalasynda ótken jarystan jerlesterimiz bes júldemen oraldy. Jalǵyz altyn Sergeı Matvıenkoǵa (90 kılo) buıyrsa, Ahmetolla Nurov (57 kılo) pen Sergeı Dýpıkov (100 kılo) fınalda súrindi. Al Marat Máltekbaev (62 kılo) pen Baqtııar Baıseıitov (82 kılo) qola medaldy ıelendi. Uzaq jyldar boıy sary qurlyqta ústemdik quryp kelgen Ońtústik Koreıanyń balýandary osy jarysta sarapqa salynǵan 10 bas júldeniń teń jartysyn oljalap, komandalyq esepte birinshi oryn aldy.
1995 jyly Fılıppınniń astanasy – Manılada uıymdastyrylǵan dodada Qazaqstan quramasy jeńip alǵan júldeleriniń jalpy sany boıynsha Ońtústik Koreıadan ozdy. Bizdiń jigitter arasynan Rýslan Jumabekov (74 kılo), Baqtııar Baıseıitov (82 kılo), Dáýlet Turlyhanov (90 kılo) jáne Sergeı Matvıenko (100 kılo) qarsylas shaq keltirmese, Fanıs Dáýletov (48 kılo), Kamıl Mýftı-zade (52 kılo) jáne Ahmetolla Nurov (57 kılo) qolaǵa qol sozdy. Barlyǵy – 7 júlde. Basty qarsylastarymyz 4 altyn men 2 kúmisti ıelendi.
1996 jyly Qytaıdyń Sıaoshanı qalasynda Ońtústik Koreıa men Qazaqstan quramalary bas júldeni taǵy da tórtten enshiledi. Bizdiń balýandar arasynan Iýrıı Melnıchenko (57 kılo), Dáýlet Turlyhanov (82 kılo), Sergeı Matvıenko (90 kılo) jáne Anatolıı Fedorenko (100 kılo) teńdessiz dep tanylsa, Baqtııar Baıseıitov (74 kılo) qola medaldy qanaǵat tutty. Alaıda qorjynynda qos kúmisi bar koreıler otandastarymyzdyń aldyn orap ketti.
1997 jyly Tehranda basty qarsylastarymyz úsh altyn alsa, qazaqstandyqtar qos bas júldeni ıemdendi. Bizdiń komanda músheleri qatarynan Iýrıı Melnıchenko (57 kılo) men Mhıtar Manýkıannyń (63 kılo) mereıi ústem boldy. Nurym Dúısenov (57 kılo) pen Roman Vel (97 kılo) ekinshi orynǵa taban tirese, Andreı Nıkıforov (69 kılo) úshinshi satyǵa jaıǵasty.
1999 jyly Tashkentte Mhıtar Manýkıan (63 kılo) men Sergeı Matvıenko (97 kılo) aldaryna jan salmady. Iýrıı Melnıchenko (58 kılo) kúmisti ıelense, Raqymjan Ásembekov (54 kılo) qolaǵa qol sozdy. Koreıler taǵy da tórt ret óz eliniń ánuranyn shyrqatyp, aldymyzdy orady.
2000 jyly Seýlde jergilikti balýandar qos altyndy ǵana qanaǵat tutqanyna qaramastan, osy nátıjeniń ózi komandalyq saıysta ozý úshin jetkilikti boldy. Iran, О́zbekstan, Japonııa, Qyrǵyzstan jáne Qytaımen qosa qazaqtar bir-bir retten jeńis tuǵyrynyń eń bıik satysyna kóterildi. Bul jarysta Baqtııar Baıseıitov (74 kılo) dara shyqsa, Asqar Júrsinbaev (54 kılo) pen Sergeı Matvıenko (97 kılo) kúmiske qol jetkizdi. Osy joly Ońtústik Koreıadan bólek, Iran quramasy da otandastarymyzdy artqa tastap ketti.
2001 jyly Ulan-Batyrdaǵy Azııa chempıonatyna ulttyq qurama bapkerleri qosalqy quramdaǵy balýandardy aparýdy jón kórdi. Nátıjesinde qos júldeni ıelenip, jalpy komandalyq esepte ózge eldiń birqatar komandalaryna ese jiberdik.
2003 jyly Nıý-Delıdegi jarysta asyǵymyz alshysynan túsip, sary qurlyqtyń eń úzdik komandasy atandyq. Osy baıraqty básekede Áset Imanbaev (55 kılo), Abdolla Jabyraıylov (84 kılo) jáne Georgıı Sýrsýmııanyń (120 kılo) baq juldyzdary jansa, Rústem Baıseıitov (74 kılo) pen Marǵulan Ásembekov (96 kılo) úshinshi oryndy ıelendi. Eki altyny bar Ońtústik Koreıanyń oǵlandary qazaqtardan qalyp qoıdy.
2004 jylǵy sary qurlyqtyń basty dodasyn Qazaq eli qabyldady. Alataý baýraıyndaǵy ásem shaharda ótken jarysta jasyndaı jarqyraǵan jerlesterimiz komandalyq aıqasta ózge eldiń ókilderiniń barlyǵyna shań qaptyrdy. О́z salmaq dárejelerinde taǵy da Áset Imanbaev (55 kılo), Abdolla Jabyraıylov (84 kılo) jáne Georgıı Sýrsýmııa (120 kılo) eshkimdi shydatpady. Nurbaqyt Teńizbaev (60 kılo), Roman Meleshın (66 kılo) jáne Danıl Halımov (74 kılo) sońǵy synda utyldy.
2005 jyly Qytaıdyń Ýhaninde Ońtústik Koreıany qatarynan úshinshi márte tizerlettik. Qazaqstan quramasynyń qorjyny 2 altyn, 1 kúmis jáne 2 qolamen tolyqty. Basty básekelesterimiz altyn men kúmisti bizben birdeı-aq jıdy. Olardyń tek bir qolasy kem. Qytaı elinde Marǵulan Ásembekov (96 kılo) pen Georgıı Sýrsýmııa (120 kılo) jeńimpaz atansa, Baqtııar Baıseıitov (74 kılo) sheshýshi tusta súrindi. Nurbaqyt Teńizbaev (60 kılo) pen Vıtalıı Zaharchenko (84 kılo) úshinshi satyǵa jaıǵasty.
2006 jyly apaıtóster qaıta Qazaqstanda bas qosty. Almatyda ótken dodada da negizgi básekelestik syralǵy qarsylastar arasynda órbidi. Bul joly da jigitterimiz jerge qaratqan joq. Nurbaqyt Teńizbaev (60 kılo), Marǵulan Ásembekov (96 kılo) jáne Georgıı Sýrsýmııanyń (120 kılo) qarqynyna eshkim shydamady. Vıtalıı Zaharchenko (84 kılo) – kúmis, al Beıbit Nuǵymanov (66 kılo) pen Roman Meleshın (74 kılo) qola medaldardy enshiledi.
2007 jyly Bishkekte bilgenimizden jańyldyq. Qos Áset – Ádilov (74 kılo) pen Mámbetovtiń (96 kılo) ıemdengen qos kúmisimen ǵana shektelip, qalyń toptyń arasynda qalyp qoıdyq. Koreıler de jarytyp óner kórsetken joq. Bul birinshilikte Iran men Qyrǵyzstan quramalarynyń qarqyny kúshti boldy.
2008 jyly Ońtústik Koreıanyń Chedjýinde de bas júlde buıyrmady. Marǵulan Ásembekov (96 kılo) pen Georgıı Sýrsýmııa (120 kılo) ekinshi oryn alsa, Ermek Kóketov (55 kılo), Erbol Qońyratov (60 kılo) jáne Andreı Samohın (84 kılo) úshinshi satyǵa turaqtady. Komandalyq saıysta Iran balýandarynyń aıdarynan jel esti.
2009 jyly Taılandtyń Pattaıasynda Darhan Baıahmetov (66 kılo) altyn, Almat Kebisbaev (60 kılo), Andreı Samohın (84 kılo), Marǵulan Ásembekov (96 kılo) kúmis, Ashat Qudaıbergenov (55 kılo) pen Roman Meleshın (74 kılo) qolany ıemdendi. Tórt altyndy qanjyǵalaryna baılaǵan parsy eliniń sportshylary jalpy esepte qaıta ozdy.
2010 jyly Nıý-Delıde kóńil kónshiterlik kórsetkishke qol jetkize almadyq. Aıbek Eńsehanov (66 kılo) ekinshi, Marat Ǵaripov (55 kılo) pen Marǵulan Ásembekov (96 kılo) úshinshi oryndy ıelendi. Bul joly qaıta «qaharyna mingen» Ońtústik Koreıa quramasy tórt altyndy oljalady.
2011 jyly Tashkentte Almat Kebisbaev (60 kılo) altyn tuǵyrǵa kóterilse, Beıbit Nuǵymanov (66 kılo) pen Ashat Dilmuhamedov (74 kılo) qolany enshiledi. Árıne, ondaı kórsetkishpen komandalyq esepte úzdikter qatarynan kórine almaǵanymyz anyq. Bul joly Irannyń apaıtósteri erledi.
2012 jyly Ońtústik Koreıanyń Kýmıinde de Irannyń dúldúlderi dara shyqty. Jerlesterimizdiń arasynan Erbol Qońyratov (60 kılo) birinshi, Ábdimálik Sartbaev (120 kılo) ekinshi, Eldar Qaıratov (66 kılo), Áset Ádilov (74 kılo) jáne Maqsat Erejepov (84 kılo) úshinshi satyǵa jaıǵasty.
2013 jyly Úndistannyń bas shaharyna sapar shektik. Nurmahan Tynalıev (120 kılo) – altyn, Erulan Ysqaqov (96 kılo) – kúmis, Erbol Qońyratov (60 kılo) pen Maqsat Erejepov (74 kılo) qolany ıemdendi. Jalpy esepte Ońtústik Koreıanyń oǵlandary ozdy.
2014 jylǵy Azııa chempıonaty Qazaqstannyń astanasynda uıymdastyryldy. Nursultan Tursynov (85 kılo) pen Erulan Ysqaqovtyń (98 kılo) altyny, Maqsat Erejepovtiń (71 kılo) kúmisi jáne Aıbek Eńsehanov (66 kılo) pen Azamat Qustybaevtyń (80 kılo) qolasynyń arqasynda otandastarymyz qaıta Azııanyń aldy boldy.
2015 jyly Qatardyń Dohasynda Iran quramasynyń tegeýrinine eshkim tótep bere almady. Sol eldiń ánurany aıtýly dodada úsh márte shyrqaldy. Qazaqstandyqtardyń qatarynan Nurmahan Tynalıev (130 kılo) qarsy kelgenderdiń barlyǵyn jyqty. Nursultan Tursynov (85 kılo) fınalda utyldy. Demeý Jadyraev (66 kılo), Jasulan Qashanov (80 kılo) jáne Marǵulan Ásembekov (98 kılo) úshinshi orynǵa turaqtady.
2016 jyly Bangkokte jalpy eseptiń bas júldesi parsy eline buıyrdy. Qazaqtar arasynan Dosjan Qartyqov (75 kılo) altyn, Ashat Jańbyrov (66 kılo) kúmis, Meırambek Aınaǵulov (55 kılo), Darhan Baıahmetov (71 kılo), Ashat Dilmuhamedov (80 kılo) jáne Damır Kúzembaev (130 kılo) qolany oljalady.
2017 jyly Nıý-Delıde tórt birdeı qandasymyz sońǵy aıqasqa joldama alǵanymen, olardyń arasynan tek Maqsat Erejepov (75 kılo) sýyrylyp shyqty. Meırambek Aınaǵulov (59 kılo), Almat Kebisbaev (66 kılo) jáne Damır Kúzembaev (130 kılo) ekinshi orynda qalyp qoıdy. Úshinshi satyda – Erulan Ysqaqov (98 kılo). Bul dodada da Irannyń asyǵy alshysynan tústi.
2018 jyly Bishkekte ótken sary qurlyqtyń basty dodasynda Qazaqstan quramasy 2 altyn, 1 kúmis jáne 4 qolany ıelendi. Qyrǵyz eliniń astanasynda Almat Kebisbaev (67 kılo) pen Ashat Dilmuhamedov (82 kılo) aldaryna jan salmady. Demeý Jadyraev (72 kılo) ekinshi orynda. Úshinshi satyda – Qorlan Jaqansha (55 kılo), Meırambek Aınaǵulov (63 kılo), Maqsat Erejepov (77 kılo) jáne Erulan Ysqaqov (97 kılo).
Joǵarydaǵy derekter jeńispen órilgen baı dástúri bar otandyq grek-rım kúresiniń áli de áleýeti zor ekenin ańǵartyp tur. Azııa chempıonatynyń jalpy esebinde Qazaqstan quramasy birneshe márte bas júldeni oljalady. Jerlesterimizdiń jeńip alǵan júldeleriniń sany da ájeptáýir. Bul kúnderi ulttyq komandamyzdyń sapynda óner kórsetip júrgen jigitterdiń arasynda da azýlylar az emes. Olaı bolsa, Qytaı elinde ótetin baıraqty básekede bizdiń balýandar Azııanyń bas komandasy ataný úshin baryn salady degen oıdamyz.
2018 jylǵy Azııa chempıondary
55 kılo – Seta Tanakýra (Japonııa)
60 kılo – Sınobý Ota (Japonııa)
63 kılo – Elmurat Tasmuratov (О́zbekstan)
67 kılo – Almat Kebisbaev (Qazaqstan)
72 kılo – Aqjol Mahmudov (Qyrǵyzstan)
77 kılo – Iаn Bın (Qytaı)
82 kılo – Ashat Dilmuhamedov (Qazaqstan)
87 kılo – Hýsseın Nýrı (Iran)
97 kılo – Mustafa Salehızade (Iran)
130 kılo – Behnam Mehdızade (Iran)