«Saılaý týraly» konstıtýsııalyq zańnyń 56-babynyń 1-tarmaǵyna sáıkes, saılaýshylardyń prezıdenttikke kandıdatty qoldaýy qol jınaý arqyly rastalady jáne osy zańnyń 3-tarmaǵy prezıdenttikke kandıdatty qoldap qol jınaýdy senim bildirilgen adamdar uıymdastyrady jáne kandıdattyń Konstıtýsııada jáne «Saılaý týraly» konstıtýsııalyq zańda belgilengen talaptarǵa sáıkestigin teksergennen keıin bes kún merzimnen keshiktirmeı OSK beretin qol qoıý paraqtarymen resimdeletini aıtyldy. Prezıdenttikke kandıdatty oblystardyń, respýblıkalyq mańyzy bar qalalar men respýblıka astanasynyń kem degende úshten ekisiniń atynan teńdeı ókildik etetin saılaýshylardyń jalpy sanynyń kem degende bir paıyzy qoldaýy tıis. Tizilimge sáıkes 2019 jyldyń
1 qańtarynda elimizdegi saılaýshylar sany 11 mln 814 myńnan sál artyq adamdy quraıdy. Demek, prezıdenttikke kandıdatty kem degende 118 myń 140 saılaýshy qoldaýy kerek.
Sonymen birge kandıdattardyń saılaý naýqanyn ótkizýge kómektesetin, saılaý aldyndaǵy úgitti júrgizetin, múddelerin qorǵaýǵa senim bildirilgen adamdar alýǵa quqy bar. Kandıdattar senim bildirgen adamdaryn óz qalaýy boıynsha tıisti saılaý okrýgindegi árbir saılaý ýchaskesine úsh adamnan aspaıtyn sanda tirketedi. О́z kezeginde olar tıisti saılaý komıssııasyna senim bildirilgen adamdar bolýǵa óz kelisimin beretini týraly ótinish beredi. Aýmaqtyq saılaý komıssııasy senim bildirilgen adamdar tirkelgennen keıin olarǵa tıisti kýálik beredi. Senim bildirilgen adam Qazaqstan Respýblıkasynyń azamaty bolýy tıis, sonymen birge ol qandaı da bir saılaý komıssııasynyń múshesi, saıası memlekettik qyzmetshi bola almaıdy. Saılaý týraly qoldanystaǵy zańnamaǵa sáıkes, senim bildirilgen adamdar qol jınaýdy uıymdastyrý maqsatynda qol jınaıtyn basqa da adamdardy tarta alady.
Qol jınaý jónindegi toltyrylǵan paraqtar aýmaqtyq saılaý komıssııasyna tapsyrylady, ol 10 kúndik merzimde pasport qyzmetteriniń jumyskerlerin tarta otyryp, qoıylǵan qoldardyń durystyǵyn tekserýdi júzege asyrady, prezıdenttikke kandıdatty qoldaıtyn qoldardyń durystyǵyn tekserý nátıjeleri týraly tıisti hattamany resimdeıdi jáne ony Ortalyq saılaý komıssııasyna jiberedi.
Sonymen birge «Prezıdenttikke kandıdatty qoldap, qol jınaýdy jáne olardyń durystyǵyn tekserýdi uıymdastyrý týraly» arnaıy qaýlymen OSK qol jınaý paraqtaryn berý merzimin 5 kúnnen 2 kúnge deıin qysqartylǵanyn jáne qoldardyń durystyǵyn tekserý merzimi 10 kúnnen 5 kúnge deıin qysqarǵany jetkizildi. Osylaısha, saılaýdy uıymdastyrýshylar ishki rásimderdi ótkizý merzimderin qysqartý esebinen saılaý prosesine qatysýshylardyń is-sharalaryna arnalǵan ýaqytty ulǵaıtqan eken.
Saılaý komıssııalarynyń múshelerin jáne saılaý prosesiniń basqa da qatysýshylaryn oqytýdy uıymdastyrý týraly baıandaǵan S.Mustafına bul sharanyń 2017 jylǵy 15 maýsymda «Qazaqstan Respýblıkasyndaǵy saılaý týraly» konstıtýsııalyq zańyna engizilgen ózgeristermen, sondaı-aq 2018 jylǵy 29 maýsymda Qazaqstan Respýblıkasynyń Bıýdjet kodeksine jáne «Qazaqstan Respýblıkasyndaǵy jergilikti memlekettik basqarý jáne ózin ózi basqarý týraly» Qazaqstan Respýblıkasynyń Zańyna engizilgen tolyqtyrýlardyń negizinde iske asyrylatynyn jetkizdi. 2017 jyldan bastap ázirlengen Jol kartasy sheńberinde Memlekettik basqarý akademııasynyń bazasynda oqytýmen elektorattyq prosesti uıymdastyrýshy memlekettik qyzmetshiler arasynan oblys ákimderiniń orynbasarlary, qala, aýdan ákimderi jáne olardyń orynbasarlary, ákimder apparattarynyń basshylary, barlyq deńgeıdegi máslıhat hatshylary, ishki jáne jastar saıasaty, mádenıet, tilderdi damytý basqarmalarynyń basshylary oqytylady. Jol kartasy sheńberinde OSK 2,5 jyl ishinde 62 oqytý is-sharalaryn (dárister, semınarlar, trenıngter, vebınarlar, jazǵy mektepter) ótkizip, oǵan 14 610 adam qatysqan. Osy saılaý naýqanynda mamyrdyń aıaǵyna deıin – barlyq tizbelengen oqytý túrlerin paıdalana otyryp, ýchaskelik saılaý komıssııalarynyń barlyq músheleri oqytylady.
Keńeıtilgen otyrys qorytyndylary boıynsha OSK músheleri BAQ ókilderiniń suraqtaryna jaýap berdi.