On jyldan beri álemde keń tarap kele jatqan «PechaKucha» alǵash ret Tokıoda 2003 jyly uıymdastyrylǵan. Keıin San-Fransısko, Amsterdam, Melbýrnde jalǵasyn tapqan. Londonda ótken «PechaKucha»-ǵa eki myń adam qatysqan. Al elimizde atalǵan formattaǵy basqosý 4 jyldan beri ótkizilip keledi eken. Osy ýaqytta óziniń belgili bir aýdıtorııasyn da qalyptastyryp úlgeripti.
Mınıstrlik qoldaǵan osy jolǵy sharaǵa 100-ge jýyq tyńdaýshy keldi. Uıymdastyrýshylardyń aıtýynsha, ádette 400-500 adamnan jınalady, tipti keı kezderi bir kıno zaly tolatyn kórinedi. Osy jolǵy az jınalýynyń sebebin olar kelýshilerdiń únemi ótip otyratyn kúnine úırenip qalýymen túsindirdi. Qazaqstan kásipodaqtar federasııasy oqý ortalyǵynyń dırektory, bas qaladaǵy «PechaKucha»-nyń uıymdastyrýshysy Nurlan Dosym bul jıyndy uıymdastyrýda 20 sanynyń aıryqsha máni bar ekenin jetkizdi. Máselen, elordadaǵy «PechaKucha» ár aıdyń 20-da 20 saǵat 20 mınýtta bastalady. «Japondar úshin 20 sekýnd altyn ýaqyt sekildi. О́ıtkeni olar osy ýaqyt ishinde bir esepti shyǵaryp, ol bitkende jyldam kelesisine ótip otyrady. «PechaKucha»-da da spıkerge 20 slaıdtan turatyn prezentasııasynyń ár paraqshasyn túsindirýge nebári 20 sekýnd beriledi. Odan keıin kelesi bet ashylyp ketedi», deıdi uıymdastyrýshy N.Dosym. Onyń aıtýynsha, ár spıkerge berilgen ýaqyt shekteýli bolǵanymen, baıandamasy bitkennen keıin suraqtarǵa jaýap berip, tyńdaýshylarmen erkin dıalogqa túse alady. «Biz bul sharany tek adamdar úshin jasaımyz. Kóńildi nemese demalatyn jer izdegen jastar túngi klýbqa, bolmasa qumar oıyndarǵa barmaı, ystyq kofe, túrli táttilerden dám tata otyryp osyndaı oıly orta qalyptastyrǵanyn qalaımyz. Barlyǵy – tyńdaýshylarǵa tegin. Olar bos ýaqytyn tıimdi ótkizse, jetistikke jetken jandardyń oıyn, jańa ıdeıalaryn tyńdasa, bir-birimen áńgimelesip, syrlassa, dos, ıdeıalas, seriktes adam tapsa dep uıymdastyramyz», deıdi N.Dosym.
«PechaKucha» sahnasynda qoǵam qaıratkerleri, kásipkerler, sportshylar, shyǵarmashylyq adamdary sóz sóıleıdi. Osy jolǵy jıynda da ár salada jetistikke jetken jandar bilgenimen bólisti. «100 jańa esim» jobasynyń jeńimpazy Ámir Qýat «Ǵylym jeńedi» atty prezentasııasy arqyly óz oıyn ortaǵa saldy. Ol adamdy ǵylymı turǵydan tabysty etetin dúnıe týraly aıtty. Al «Davaı shodım» jobasynyń avtory Baqdáýlet Isaev kásipti nólden bastap, qalaı dóńgeletip áketýge bolatynyn baıandady. Toǵyz tilde sóıleı alatyn Saıasat Nurbek «Qazaqstandaǵy jańa mamandyqtardyń atlasy» atty prezentasııasynda bolashaqty barlap, jastardyń qaı salaǵa bet burýy kerektigin halyqaralyq zertteýler nátıjesi arqyly kórsetti. Kofe-breıktegi úzilisten keıin Italııada ótken IronMan sýpermarafonynyń jeńimpazy Dııas Dúısebekov jetistik formýlasymen tyńdaýshylardy shabyttandyrdy. Al reseılik shoý-bıznes juldyzdaryna beınebaıan túsirip júrgen Qudaıbergen Eskenov tabys tabýmen qosa tanymaldyqqa ıe bolýdyń qyr-syrymen bólisti. «100 jańa esim» jobasynyń jeńimpazy, horeograf Anvara Sadyqova erekshe darynymen jáne ózin ózi jeńe alatyn qasıetimen tyńdarmandardy tánti etip, kórkem bıimen keshtiń shymyldyǵyn japty.