Shahardaǵy Jasyl ekonomıka basqarmasynyń ókilderi qoldaryna fotoapparat alyp, qala kóshelerin jappaı sýretke túsirip otyrmaq. Olar tekseris nátıjesinde anyqtalǵan las jerlerdiń tizimin ákimdiktegilerge jiberedi. Bul jumystar áleýmettik jeliler arqyly da baqylanady. Iаǵnı qaı aýdannyń aýmaǵy barynsha taza bolsa, sol aýdannyń basshysynyń jumysyna bes baldyq kórsetkish boıynsha jaqsy degen baǵa qoıylady. Al taza qala údesinen shyǵa almaǵandarǵa, bul máselege sergek qaraýǵa týra keledi. Mamandardyń sózinshe, tekseris qaǵazynda 13 tarmaq bar.
«Onyń eń negizgilerin atap óter bolsaq, joldar men jol jıekterine, jaıaý júrginshiler joly men aryqtardyń tazalyǵyna, qoqys tógetin alańdarǵa asa mán beriledi. Sebebi qys boıy qaraýsyz qalǵan mańǵa qoqys jınalyp qaldy. Osy baǵyt boıynsha apta saıyn aýdandardy aralaıtyn bolamyz. Aǵashtardy sanıtarlyq kesý jumystary men ózen arnalaryna da jiti nazar aýdaramyz», deıdi Jasyl ekonomıka basqarmasynyń bas mamany Aleksandr Sergeev.
Alyp shahar aýmaǵy jyl sanap ulǵaıyp keledi. Resmı málimet boıynsha qala men megapolıs mańyna aımaqtardan jylyna 50 myńǵa jýyq adam kóship keledi. Almaty Ortalyq Azııadaǵy eń kógaldy qalalardyń tiziminde. Qazirgi tańda megapolıs aýmaǵyn abattandyrý jumystary qarqyndy júrip jatyr. ALMATY