Mınıstrdiń aıtýynsha, bıýdjet qarajatynyń durys jáne tıimdi jumsalýyna birden-bir yqpal jasaıtyn ınstrýment – memlekettik aýdıt. Bıyl eseptik kezeńde 770 aýdıtorlyq sharalar atqarylǵan. Aýdıtorlyq sharalar kezinde 183 mlrd teńge qarajat qamtyldy.
30 mlrd teńge kóleminde qarjylyq buzýshylyqtar anyqtalǵan. Osy somanyń 25 mlrd teńgesi taýarlardy jetkizý, qyzmetterdi kórsetý jáne jumystardy oryndaý, bıýdjetke óteý jáne esep boıynsha kórsetý jolymen tekserý kezinde túzetilgen.
«Memlekettik satyp alýdyń rásimderi kameramen baqylaýǵa alynyp, kúndelikti onlaın-rejımde júrgizilip otyrdy. Sonymen, úsh aıdyń ishinde jalpy somasy 2 trln 696 mlrd teńgege memlekettik satyp alýdyń 525 myń 468 rásimderi baqylaýǵa alyndy» deıdi Á.Smaıylov.
Memlekettik organdarǵa zań buzý týraly 9 043 habarlama jiberildi. Nátıjesinde 123 mlrd teńgege memlekettik satyp alýdyń zańǵa qaıshy keletin qorytyndy sheshimi kúshin joıǵan.
«Aldaǵy kezeńdegi basty mindet – naqtylanǵan bıýdjettiń shyǵystaryn qolma-qol aqshamen qamtamasyz etý. Ol úshin respýblıkalyq bıýdjettiń kiristeriniń naqtylanǵan josparyn tolyq oryndaýymyz qajet. Al, ortalyq jáne jergilikti memlekettik organdar memlekettik satyp alý prosedýralaryn jyl sońyna qaldyrmaı, birinshi jartyjyldyqta aıaqtaýlary qajet» dedi Mınıstr.