Premer-Mınıstrdiń orynbasary - Qarjy mınıstri Álıxan Smaıylov prezıdenttik saılaýǵa jumsalatyn qarjynyń naqty somasyn atady. Bul týraly QazAqparat habarlady.
«Mınıstrler kabınetiniń búgingi otyrysynda biz Úkimettiń rezervinen saılaýdy ótkizýge 9,4 mıllıard teńgeni bólýge sheshim qabyldadyq. Atalǵan qarajat respýblıka boıynsha ashylatyn 10 myńǵa jýyq saılaý ýchaskesiniń jumysyn uıymdastyrýǵa jumsalady. Ol jerlerde 70 myńǵa jýyq adam isteıdi. Árıne, ol qarjynyń basym bóligi saılaý ýchaskelerinde jumys isteıtin adamdardyń jalaqysyna baǵyttalady», dedi Á.Smaıylov.
Onyń aıtýynsha, bastapqy soma aımaqtardan túsken tapsyrystardyń negizinde jasalǵan bolatyn. Artynan Úkimet árbir aımaqta ashylatyn saılaý ýchaskeleri men ol jerde jumys isteıtin adamdardyń sanyn naqtylady.
«Sóıtip, 9,4 mıllıard teńge kólemindegi somany shyǵardyq», dep atap kórsetti Á.Smaıylov.