«Elızabet Tursynbaevanyń álemdik dodalarda jeńip alǵan úsh birdeı kúmis medali bizdiń eńsemizdi kóterip tastady. Lıza «Tórt qurlyq chempıonaty» men Ýnıversıada oıyndarynda, sondaı-aq, jyldyń eń basty sporttyq oqıǵasy – álem birinshiliginde tuǵyrdan kórindi. Bul biz úshin úlken jetistik! Odan bólek, Tursynbaeva áıelder arasyndaǵy mánerlep syrǵanaý sportynyń tarıhynda tuńǵysh ret tórttik salhovty oryndady. Tórt aınalym salhov óte qıyn element. Buǵan deıin resmı jarystarda ony eshkim oryndaǵan joq. Iаǵnı, áıelder oryndap kelgen eń aýyr element úsh jarym aınalymdyq aksel bolatyr. Áıtse de, Lıza óziniń naǵyz kúresker ári batyl ekenin kórsetip, mánerlep syrǵanaý sportynyń tarıhyna endi. Ol ózin dáleldedi», - deıdi Ýzýrova.
Bas bapker elimizde Tursynbaevadan bólek talantty jastardyń ósip kele jatqanyna basa nazar aýdardy.
«Qyzdar arasynda Alana Toqtarova esimdi talantty sportshymyz bar. Zagrebte ótken halyqaralyq týrnırde úzdik úshtikke endi. Ázirge ol áli jas, degenmen, qıyn elementterdi oryndaýymen kózge túsip júr. Onyń baǵdarlamasynda úsh aınalym kaskad ta bar. Alananyń bolashaǵynan úlken úmit kútemiz. Sondaı-aq, jasóspirimder arasynda erekshelenetin Marııa Grechanaıany da atap ótkim keledi. Tap osy qyzymyz jasóspirimder arasyndaǵy álem chempıonatynda myqtylarmen ıyq tirestirýi múmkin. Jalpy alǵanda, áıelder arasyndaǵy mánerlep syrǵanaý básekesinde aıtarlyqtaı rezerv bar», - deıdi bas jattyqtyrýshy.
Erler arasyndaǵy mánerlep syrǵanaý synynda Denıs Ten sekildi birden kózge túsetin sportshylar ázirge joq. Alaıda, Rahat Bralın men Nıkıta Manko keleshekte joǵary nátıjemen qýantady degen úmit basym.
«Rahat Bralın jasóspirimder arasynda baq synaýda. Al Manko ereseter arasynda ótti. Nıkıtanyń «Tórt qurlyq chempıonatyna» joldama alyp, erkin baǵdarlamada óner kórsetkeniniń ózi úlken jeńis. Al Bralın jasóspirimder arasyndaǵy álem chempıonatyna qatysady dep josparlap otyrmyz», - dedi Quralaı Ýzýrova.
Sondaı-aq, Quralaı Ýzýrova Elızabet Tursynbaevanyń burynǵy bapkerine qaıta oralýyna qatysty da pikir bildirdi.
«Shyny kerek, Elızabettiń qaıta oralǵanyna qýanyshtymyz. О́ıtkeni, Eterı Týtberıdzeniń qolastyna kelgeli ol óte sátti maýsym ótkizdi. Lıza mánerlep syrǵanaýdaǵy alǵashqy qadamyn sol Týtberıdzeden bastaǵan. Demek, Reseıdegi mánerlep syrǵanaý mektebi oǵan jaqyn. Sondyqtan, burynǵy bapkerine qaıta oralǵany jaqsy boldy. Bir ǵana maýsym ishinde ol elementterdi turaqty túrde oryndap, baǵdarlama sapasyn da jaqsartty. Erkin baǵdarlamany jańartyp, 4 aınalym salhovty qosty. «Tórt qurlyq chempıonaty» men Ýnıversıada oıyndarynda atalǵan elementti oryndaý barysynda Lıza qulap qaldy. Biraq sonyń ózinde bul tuǵyrdyń ekinshi satysynan kórinýge múmkindik berdi. Tursynbaevany kishkentaı kezinen beri bilemin. Ol óte batyl jáne kúresker qyz. Onyń ústine, Eterı sekildi myqty bapkerdiń qolyna tústi. Sol sebepti, odan endi tek jeńis kútemiz. Lızanyń arqasynda kelesi jylǵy álem chempıonatyna úsh kvota jeńip aldyq. Munyń bári elimizde mánerlep syrǵanaý sportynyń keńinen taralýyna úles qosýda», - deıdi bas bapker.
Aldaǵy maýsymda qazaqstandyq mánerlep syrǵanaýshydar jasóspirimder men eresekter arasyndaǵy álem chempıonatynda sátti óner kórsetýdi josparlap otyr.