Qazirgi tańda oblystyq Qoǵamdyq keńes 38 qoǵam qaıratkerin, saıası partııa fılıaldarynyń basshylaryn, eńbek ardagerleri men ǵalymdardy biriktiredi. Uıymnyń janynan túrli baǵyt boıynsha alty turaqty komıssııa quryldy.
«Búgin resmı basylymda óńirdi damytý jospary jarııalandy. Bul jospar turǵyndardyń usynystary men áleýmettik zertteýlerdiń nátıjelerine negizdelgen. Men osy qujatta qarastyrylǵan oblysty damytý sharalaryna qatysty usynystaryńyz ben oılaryńyzdy estigim keledi»,- dedi kezdesýdi ashqan Ońdasyn Orazalın.
Keńes músheleri aýyldardy gazdandyrý, bıýdjet qarajatyn únemdeý, jol qurylysy, aýyl sharýashylyǵyn, kásipkerlik pen úkimettik emes uıymdardy damytý boıynsha birqatar usynystar engizdi.
«Osy kezdesýge bastamashylyq etkenińiz úshin alǵys aıtamyz. Biz yntymaqtas bolyp, bılik pen qoǵam arasyndaǵy qarym-qatynastyń tıimdi arnasy bolýǵa daıynbyz»,- dedi keńes tóraǵasy, memlekettik qyzmet ardageri Baǵlan Baımaǵmbetov.
Kezdesý sońynda oblys ákimi Qoǵamdyq keńes aldyna ózekti áleýmettik problemalardyń jańa sheshimderi jáne jastarmen tárbıe jumystaryn júrgizýdi kúsheıtý syndy birqatar mindetter qoıdy.