Beısenbi, 5 shilde 2012 8:36
Sport – densaýlyq, sport – sulýlyq, sport – jetistik, sport – adam múmkindiginiń qyrlary. Biz osyny árdaıym jadymyzdan shyǵarmaýymyz kerek.
(Elbasymyz N.Á.Nazarbaevtyń qazaqstandyq olımpııashylarmen kezdesýde sóılegen sózinen).
Keshe Aqordada Memleket basshysy Nursultan Nazarbaev XXX London jazǵy Olımpııa oıyndaryna qatysatyn Qazaqstan ulttyq quramasynyń múshelerin qabyldady.
Beısenbi, 5 shilde 2012 8:36
Sport – densaýlyq, sport – sulýlyq, sport – jetistik, sport – adam múmkindiginiń qyrlary. Biz osyny árdaıym jadymyzdan shyǵarmaýymyz kerek.
(Elbasymyz N.Á.Nazarbaevtyń qazaqstandyq olımpııashylarmen kezdesýde sóılegen sózinen).
Keshe Aqordada Memleket basshysy Nursultan Nazarbaev XXX London jazǵy Olımpııa oıyndaryna qatysatyn Qazaqstan ulttyq quramasynyń múshelerin qabyldady.
Elbasy ózi burynnan qalyptastyrǵan dástúrge saı tórt jylda bir ótetin basty álemdik básekeniń qarsańynda egemen elimizdiń namysyn qorǵaıtyn olımpıadalyq komandanyń daıyndyǵyna qanyǵyp, ózderine ákelik aq jol tileý úshin taǵy da sportshylar men jattyqtyrýshylardy janyna jınady.
– Bizdiń elimiz qashannan zor sporttyq jetistikterimen erekshelenedi. Tek ótken jyldyń qorytyndysy boıynsha ǵana bizdiń sportshylarymyz álemdik birinshilikterde 15 túrli joǵary nagradany jeńip aldy, – dedi Nursultan Nazarbaev sóziniń kirispesinde. – Biz keshegi keńestik kezeńde de sportta alda boldyq. Keńes Odaǵy tusynda da Qazaqstannan chempıondar shyqty. Al táýelsizdik alǵannan keıin bizdiń kóptegen sańlaqtarymyz Olımpıada men álem birinshilikterinde erkin óner kórsetýge úlken múmkindikter aldy. Elimizdiń sporty osy jyldarda aıtarlyqtaı joǵary qarqynmen damyp keledi. Osy rette ótken jylǵy Qysqy Azııa oıyndarynda sportshylarymyzdyń 32 altyn medaldiń ıegeri atanǵanyn aıtyp ótýimizge bolady. Munyń ózi respýblıkanyń qysqy sport sańlaqtarynyń qurlyqta aldyńǵy qatarda turǵanyn kórsetip berdi.
Odan ári Prezıdent qazaqstandyq sportshylardy jaqsy biletinin atap kórsetti. Buqaralyq aqparat quraldary kúni búginge deıin sizderdiń árbirińizdiń úlken doda aldyndaǵy daıyndyqtaryńyzdyń barystaryn udaıy jan-jaqty kórsetip otyrdy. Biz osy kezderde Londonnyń lısenzııasyn utyp alǵan árbir sportshymyzdy Qazaqstanǵa keńinen tanystyryp otyrýǵa kúsh saldyq. Endi, mine, sheshýshi sát te kelip jetti – osy aıdyń sońyna qaraı bizdiń bárimiz kópten kútken Olımpıada da bastalady. Qazaqstan sizderdiń osy Oıyndarda barynsha tabysty óner kórsetýlerińiz úshin barlyq jaǵdaıdy jasady. Táýelsizdik jyldarynda sport salasyn órkendetýge orasan zor qarjy bóline bastady. Elimizdiń barlyq óńirinde sporttyq nysandar kóptep salynýda, qaıta jóndeýden ótkizilgenderi de barshylyq, dedi Elbasy. Sondyqtan aldaǵy Olımpıadada úmittiń úkisin taǵyp otyrǵan sańlaqtarymyz naǵyz qazaqstandyq sportshynyń minezin kórsetip, tileýlesteri kútken bıikterden kórinýleri tıis. Sportshylarymyz ózderine mıllıondaǵan qazaqstandyqtardyń kóz qadap otyrǵanyn sezinýleri kerek.
Elimiz ulttyq qurama komandasynyń músheleri aldyna osyndaı mindet qoıǵan Memleket basshysy Oıyndarda sporttyń 27 túri boıynsha elimizdiń 107 sportshysy synaqqa túskeli turǵanyn tilge tıek etti. Jalpy, bul dodaǵa jer-jahannyń 10,5 myń sportshysy qatysyp, sporttyń 39 túrinen 302 medal jıyntyǵyn sarapqa salady.
– Tórt jylda bir aınalyp keletin Olımpıadaǵa qatysý jáne onda jeńiske jetý ózin ózi laıyqty baǵalaı alatyn árbir sportshy jetistiginiń shyńy bolyp tabylady, – dedi Nursultan Ábishuly kelesi kezekte. – Búginde sport – jáı ǵana jarys emes. Ol – kez kelgen eldiń halyqaralyq dárejedegi ımıdjin qalyptastyratyn sala. Bylaısha aıtqanda, sport bir jaǵynan sportshynyń jetistigin kúlli álemge kórsetip jatsa, ekinshi jaǵynan osy arqyly ózin shyǵarǵan eldi sol jalpaq jahanǵa tanystyryp jatady. Olımpıadashylardyń jeńisinen keıin balalar sport seksııalaryna barady. Búginde sporttyń buqaralyq sıpat alýyna aıryqsha kóńil bólip otyrǵan memleketimiz qazaqstandyqtardyń keminde 30 paıyzy sportpen aınalysýyn, salamatty ómir saltyn ustanýyn mindet etip qoıyp otyr. Halyq árdaıym sporttyq jetistikterdiń aınalasyna toptasady, qazaqstandyq patrıotızm negizinde búkil elimiz birigedi. Sport – densaýlyq, sport – sulýlyq, sport – jetistik, sport – adam múmkindiginiń qyrlary. Biz osyny árdaıym jadymyzdan shyǵarmaýymyz kerek.
Osydan keıin Elbasy 1996 jyly Qazaqstannyń ulttyq olımpııalyq quramasynyń tarıhta tuńǵysh ret derbes komanda bolyp Olımpıadaǵa qatysqanyn eske aldy. Soǵan deıin 1972 jyly Mıýnhende basketbolshy Áljan Jarmuhamedovtiń Olımpıada chempıony atanyp, rýhymyzdy qandaı kóterip ketkenin, gımnasshy Nellı Kımniń eki Olımpıadada bes dúrkin chempıon bolyp, abyroıymyzdy qalaı asyra túskenin áńgimege arqaý etti. Egemendik jyldarynda boksshylarymyz birinen soń biri Qazaqstandy aıdaı álemge tanyta bastady. Solardyń sapyndaǵy Ermahan Ybyraıymov, Bekzat Sattarhanov, Baqtııar Artaev, Baqyt Sársekbaev syndy sańlaqtarymyz elimizdiń atyn Olımpıada tarıhyna altyn áriptermen qaldyrdy. Bulardyń bári, álbette, táýelsizdiktiń arqasynda múmkin boldy. Qaısybir jyly Qazaqstannyń velosıpedshiler komandasy úlken jetistikke jetip, kúlli jer betine elimizdiń esimin jalaýlata jazyp berdi. Bulardyń bári eshqashan umytylmaıdy. Olar halyqtyń júreginde, sanasynda, jadynda máńgilikke jarqyrap qalyp qoıdy, dedi Prezıdent.
– Men sizderdi búgin Londonǵa jol júrer aldynda sátti sapar tilep, aq batamdy berý úshin shaqyryp otyrmyn, – dedi Elbasy budan soń. – Endi ózderińizdi tyńdap kóreıik. Sońǵy Beıjiń Olımpıadasynyń altyn júldegeri Ilıa Ilınniń ne aıtpaǵy bar?
Osy qaratpa sózden keıin áıgili aýyr atletimiz birden áńgimesiniń tıegin aǵytyp ala jóneldi. Ol óziniń sózin Memleket basshysyna ózderine kórsetip otyrǵan udaıy ákelik qamqorlyǵy úshin zor alǵys sezimin jetkizýden bastady.
– Elimizdiń ulttyq quramasy Otanymyzǵa abyroımen oralý úshin qoldan kelgenniń bárin jasaıdy, – dep sendirdi ol Elbasyn. – Bul sportshylarymyz úshin jasalyp otyrǵan barlyq jaǵdaı men qamqorlyqqa bizdiń qaıtaratyn jaýabymyz bolyp tabylady. Biz árdaıym búkil jan-dúnıemizben Sizdiń qoldaýyńyzdy sezinip otyramyz. Beıjiń Olımpıadasyndaǵy kórsetkishi boıynsha Qazaqstan aldyńǵy otyz eldiń qataryna enip edi. Endi Londonda biz sol jetistigimizdiń kezdeısoq kelmegenin dáleldeýimiz kerek. Biz álemdegi eń myqty degen sportshylardyń ózimen laıyqty básekege túsýge daıyn ekenimizdi málimdegim keledi. Qazaqstannyń qazirgi zamanǵy jáne myqty memleket ekenin búkil álemge taǵy da tabandylyqpen tanytatyn bolamyz. Siz meniń barsha jeńisterimniń naǵyz birlesken avtory bolyp sanalasyz.
Osy jerde aýyr atletterdiń sońǵy kezderi qol jetkizip kele jatqan tabystaryna súısinistik bildirgen Memleket basshysy quramanyń basshylyǵy tarapyna da jyly sózder aıtty.
– Munda Alekseı Gennadevıchtiń kóp úlesi bar ekeninen habardarmyn, – dedi Nursultan Nazarbaev. – Aýyr atletterden kóp úmit kútýge bolatynyn da bilemin. Mynadaı júrekjardy jyly lebizden keıin aýyr atletıkadan elimiz qurama komandasynyń kóp jyldardan bergi úzilissiz bas jattyqtyrýshysy Alekseı Nı ózin ózi toqtatyp tura almady.
– Búginde aýyr atletıka boıynsha olımpıadalyq qurama – tájirıbe men jastyqtyń qosyndysy, – dedi ol birden Elbasynyń sózin ala. – Bul daıyndyq, maqsat pen tájirıbe bizge aldaǵy Olımpıadada laıyqty óner kórsetetinimiz týraly senimmen aıtýǵa múmkindik beredi. Men ómir boıy sport salasynda eńbek etip kelemin. Keńestik kezeńde de jattyqtyrýshy boldym. Sondyqtan búgingini ótkenmen salystyrýyma bolady. Sportty damytý úshin qazirgi Qazaqstanda barlyq jaǵdaı jasalyp jatyr. Mundaı qoldaý bizde buryn-sońdy bolyp kórgen emes. Biz biregeı sport keshenderi men sporttaǵy osy zamanǵy ozyq tehnologııaǵa tikeleı Sizdiń qoldaýyńyzdyń arqasynda qol jetkizdik. Biz muny anyq sezinip, bilip otyrmyz. Jáne ony maqtan da tutamyz. Osyǵan baılanysty men Sizge sportshylar men jattyqtyrýshylar atynan zor alǵysymdy aıtamyn.
Kelesi sózdiń kezegi grek-rım kúresiniń sheberi Almat Kebisbaevqa tıdi. Ol óziniń sóziniń jelisin elimizdegi balýandar shoǵyrynyń jas kezinde kúrespen aınalysqany úshin Elbasyn erekshe jaqsy kóretininen tartty. Boz kilem sheberlerine de Ult kóshbasshysynyń búgingi júrekjardy árbir sózi qatty áser etip otyr. Bul kezdesýden olar boıǵa qaıtpas qaırat aldy. «Aqordanyń aıasynan ákelik qamqorlyq jasap otyrǵan Sizdiń yqylasyńyzdan alǵan qýatty biz eshqaıdan ala almaımyz. Bul – bizdiń tánimizge emes, janymyzǵa berilgen kúsh. Qazaq sportshylary qashan da báseke ataýlynyń bıigi – Olımpıadadan quralaqan oralǵan kezi bolǵan emes. Sondyqtan da biz osy jolda aldyńǵy býyn aǵalarymyzdyń dańqty joldaryn laıyqty jalǵastyrýǵa barymyzdy salamyz. Siz artyp otyrǵan zor senimdi aqtaýǵa barynsha umtylamyz», – dedi ol.
Londonda tuńǵysh ret ótkizilgeli otyrǵan bokstan áıelder arasyndaǵy týrnırdiń qatysýshysy Marına Volnova osy oıdy odan ári jalǵastyryp áketti. О́ziniń sózin taza qazaq tilinde jetkizgen bylǵary qolǵap sheberi Qazaqstannyń sporty úshin álem aldynda maqtanýǵa bolatynyn málimdedi. Ol Olımpııa oıyndaryna joldama alýdyń ózderi úshin birinshi jeńis bolsa, ekinshi jeńiske Londonda qol jetkizetinin aıtty.
– Endigi negizgi maqsat – osy saparda tek Sizdiń aq batańyzben el namysyn qorǵaý. Asa mártebeli Prezıdent, jeńispen oralamyz dep sendirýge ruqsat etińiz, – dedi boksshy qyz.
Budan keıin Londondaǵy úkili úmitimizdiń biri, jeńil atlet Olga Rypakova sóz aldy.
– Siz bir joly bizdiń elimizdi barysqa teńep edińiz, – dedi ol erekshe tolǵanys ústinde. – Bul – shynynda óte bir ádemi teńeý. Sol Qazaqstan barysy osy kezge deıin qatarynan úsh ret rekordtyq sekiris jasady. Birinshi sekiris – táýelsizdiktiń qalyptasýy men memlekettiliktiń nyǵaıtylýy. Ekinshisi – onjyldyqtaǵy ekinshi sekiris tabysty damý men samǵaýdy bildiredi. Endigi jerde, úshinshi onjyldyqta, biz jetistikterimiz ben jeńisterimizdi bekitýimiz kerek.
Qorytyndy sózdi Memleket basshysy aldy.
– Meni Ulybrıtanııa basshylyǵy Olımpııa oıyndaryna shaqyrdy, – dedi Prezıdent. – Ol jerge barýǵa nıettenip otyrmyn. Bálkim, áldeqandaı jarystardy kórýdiń múmkindigi týyp qalar. Eń bastysy, men sizderdiń daıyn ekendikterińizdi anyq ańǵardym. Eldiń sporttaǵy jetistikteri onyń álemdegi ornyn belgilep beredi, memlekettiligin nyǵaıtady, halyqtyń toptasýyna yqpalyn tıgizedi. Men Úkimetke ǵylymı-zertteý ınstıtýty men antıdopıng ortalyǵyn ashý máselesin zerttep bilý týraly tapsyrma berdim. Bizdiń sporttyq áleýetimiz jaqsy. Osy múmkindikti damytatyn bolamyz. Búkil Qazaqstan sııaqty bizdiń sporttyq komandamyz da kópultty. Bul – Qazaqstan halqynyń sporttyq assambleıasy. Munyń mańyzy óte zor. Iаǵnı, búkil Qazaqstan sııaqty dostyqpen, bir komandamen óner kórsetý jáne de jeńiske jetý qajet.
Osy oraıda Elbasy elimizdegi jankúıerler sportshylarymyzǵa jan-jaqty dem berip, barlyq qoldaý sharalaryn atqaratyndyǵyn basa aıtty. Beıjiń Olımpıadasyna men de bardym, qalashyqta boldym. Bireýlerińizben kezdesken de shyǵarmyz jáne osy joly da bul dástúrdi jalǵastyratyn bolamyz, dedi Memleket basshysy.
Saltanatty qabyldaýdyń sońynda Nursultan Nazarbaev elimiz ulttyq quramasynyń elimizdiń Olımpııa oıyndaryna aparatyn Memlekettik týyn komandanyń tý ustaýshysy – balýan Nurmahan Tinálıevke óz qolymen tabys etti.
Osydan keıin sóz alǵan Nurmahan Tinálıev osynaý kórsetilip otyrǵan zor senim úshin Elbasyna alǵys sezimin jetkizdi. Ol Elbasynyń senimin, barsha eldiń senimin aqtaý úshin, kók týymyzdyń kók júzinde sharyqtap, ánuranymyz álemge shyrqalýy úshin, Qazaqstannyń kúshti jáne órkendegen memleket retinde dańqyn shyǵarý úshin qoldan kelgenniń bárin jasaýǵa daıyn ekendikterin jetkizdi.
Kezdesýdiń túıininde Nursultan Nazarbaev sportshylar men jattyqtyrýshylarǵa Londonda ótetin Olımpııa oıyndaryna senimmen attanyp, jeńispen oralýdy tiledi.
Sońynan Memleket basshysy olımpıadashylarmen birge eskertkish sýretke tústi.
Serik PIRNAZAR,
«Egemen Qazaqstan».