Keshe Parlament Senatynyń Tóraǵasy, Álemdik jáne dástúrli dinder lıderleri sezi Hatshylyǵynyń basshysy Qasym-Jomart Toqaev mıtropolıt Mefodııdi onyń ótinishi boıynsha qabyldady, dep habarlady Qazaqstan Respýblıkasy Parlamenti Senatynyń baspasóz qyzmeti.
Kezdesý barysynda Q.Toqaev bizdiń elimizdegi mıtropolıt okrýginiń burynǵy basshysyna Qazaqstan qoǵamdastyǵyndaǵy ulttyq birlik pen dinaralyq kelisimdi qamtamasyz etý isine zor úles qosqany úshin rızashylyq bildirip, onyń Álemdik jáne dástúrli dinder lıderleri seziniń jumysyna belsendi túrde qatysqanyn atap ótti.
Q.Toqaevtyń aıtýynsha, Qazaqstan basshylyǵynyń elimizdi jańǵyrtý men ilgeriletý barysyndaǵy ishki turaqtylyqty qamtamasyz etý maqsatyndaǵy kúsh-jigerimen Orys pravoslavıe shirkeýiniń qyzmeti de úılesip otyr. Tóraǵa sondaı-aq Orys pravoslavıe shirkeýiniń patrıarhy Kırılldiń taıaýdaǵy Qazaqstanǵa sapary men onyń Prezıdent N.Nazarbaevpen kelissózderiniń mańyzdylyǵyn atap ótti.
Mıtropolıt Mefodıı dinaralyq únqatysý jónindegi joǵarǵy deńgeıdegi kezdesýler ótkizý jónindegi birlesken jumystary úshin Senat Tóraǵasy Q.Toqaevqa alǵys aıtty.
“Men Orys Pravoslavıe shirkeýiniń ókili retinde Qazaqstanda jumys isteý múmkindigine ıe bolǵanymdy maqtanysh etemin. Men Qazaqstan men onyń halqyn shynaıy jaqsy kórdim”, – dedi mıtropolıt.
Mıtropolıt Mefodıı Kıeli sınodanyń sheshimimen bıylǵy 5 naýryzda Perm jáne Solıkamsk eparhııasynyń basqarýshysy bolyp taǵaıyndaldy.
* * *
Keshe Senat Tóraǵasy bizdiń elimizde ótken Álemdik jáne dástúrli dinder lıderleri sezine belsendi qatysýshy, ǵulama ǵalym Sheıh Mýhammad Saıd Tantaýıdiń mezgilsiz qaıtys bolýyna baılanysty Egıpet Arab Respýblıkasynyń Ýaqyftar jáne ıslam isteri jónindegi mınıstrine kóńil aıtý jedelhatyn jiberdi