GGG-diń qarsylasy kim?

Byltyrǵy jyldyń qyrkúıek aıynyń bel ortasynda Gennadıı Golovkın meksı­kalyq Saýl «Kanelo» Alvaresten upaı sany­men utylyp, beldi nusqa­lar boıyn­sha chempıondyq bel­beýleriniń bárinen aırylǵan edi. Uzaq ýaqyt boıy orta salmaqtyń teńdessizi atanyp, barsha jurtty aıshyqty óneri jáne jarqyn jeńisterimen qýantyp kelgen áıgili jerlesimizdiń bul sátsizdigi qazaqstandyq jankúıerlerge de aýyr soqqy bolyp tıdi. 

Barsha jurttyń Golovkındi jaqsy kóretini belgili. Ol ózge ká­sipqoı boksshylar sekildi esh­ýaqytta maqtanbaıdy, masattanbaıdy, jeńistiń býyna mastanbaıdy. Keýdesin kerip, kópire sóılemeıdi. Bir sózben aıtsaq, Gena úndemeı-aq, úlken is tyndyryp júrgen myqty azamat. Al bizder úshin eń mańyzdysy – sharshy alańǵa ol únemi qazaqtyń shapanyn kıip shyǵyp, uzaq jyldar boıy Qazaqstannyń sporttyq dańqyn asqaqtatty. Elbasy Nursultan Nazarbaevtyń aldyn­da turyp: «Ákem – orys, anam – ko­reı, al men – qazaqpyn!» dep aıt­qan bir aýyz ǵana sóziniń ózi nege turady. 

2006 jyldan beri kásipqoı rıngte kúsh synasyp júrgen Go­lovkın sol sátke deıin ótkizgen 39 kezdesýdiń 38-inde jeńiske jet­ti. 34 qarsylasyn kesilgen te­rek­teı sulatyp saldy. 2017 jyl­dyń kúzinde GGG men «Kanelo» arasyndaǵy básekede teń esep tirkeldi. Negizi sol joly bizdiń jigit utqan edi. Alaıda qazylar alqasy ádildikti belden basty. Sol jekpe-jekten keıin biraz daý-damaı bolǵany belgili. Biraq odan eshteńe ózgergen joq. 

Álem chempıony ataǵynan aırylǵannan keıin otandasymyz biraz ýaqyt boıy oılanyp-tolǵanyp júrdi. Aqyry áıgili DAZN servısimen kelisimshartqa otyr­dy. Endi ol 8 maýsymda qaı­ta sharshy alańǵa shyǵady. Al Nıý-Iorkte Gennadıı Go­lov­kın­men judyryqtasatyn kana­da­lyq boksshy jaıynda biz ne bilemiz? 

Stıv Rolls 1984 jyly Úıeń­ki japyraqtar elindegi Ontarıo provınsııasyndaǵy Gamılton qalasynda dúnıege keldi. Áýes­qoı rıngte biraz tájirıbe jıdy. Kanadanyń eki dúrkin chempıony atanǵannan keıin 2009 jyly Mılanda ótken álem chempıonatynda baq synaý qurmetine ıe boldy. 75 kılo salmaq dáre­jesinde óner kórsetken ol al­ǵashqy aınalymdarda grýzııalyq Le­van Gýledanı (10:3) men ıta­lııalyq Lýka Poddany (7:6) qapy qaldyrǵanymen, 1/8 fınalda úndistandyq Vıjender Sınghke (2:4) ese jiberdi. 

2011 jyldan beri Rolls ká­sip­qoı rıngte judyryqtasýda. Sol aralyqta 18 kezdesý ótkizip, bar­lyǵynda jeńiske jetti. 10 qar­sylasyn nokaýtpen utty. Osy oraıda kanadalyqtyń myq­ty­larmen birde-bir ret joly qıys­paǵanyn jáne eshýaqytta 12 raýndtyq jekpe-jekke shyqpa­ǵa­nyn aıta ketýge tıispiz. 

О́ziniń sońǵy kezdesýin ol byl­tyrǵy jyldyń jeltoqsan aıyn­­da Kanadada ótkizdi. Buryn­da­ry GGG-diń komandasynda bol­ǵan amerıkalyq Keandre Le­zer­vý­dany utqan Rolls USBA nus­qa­synyń altyn belbeýin ıe­lendi. 

Árıne, Stıv Rollsty osal boks­shy dep aıtýǵa bolmas. О́ıt­keni ol osy kúnge deıin eshkim­nen jeńilgen emes. Desek te Gen­nadıı Golovkın sekildi uly dúr­mekterde ábden ysylǵan saqa sportshyǵa ol qaýip tón­di­re qoımas. Qazaqstannyń maq­ta­nyshy aldaǵy jekpe-jekte de  jankúıerlerdi qýantady degen oıdamyz.