Jıyndy ashqan QarMÝ-dyń rektory Azamat Edrısov Prezıdenttik ınstıtýttyń tarıhyna toqtalyp, onyń elimiz úshin kúrdeli saıası jáne ekonomıkalyq jaǵdaıda damyǵanyn atap ótti.
– 1990 jyldyń 24 sáýirinde Qazaq KSR Joǵarǵy Keńesi «Prezıdent laýazymyn taǵaıyndaý týraly» zańdy qabyldady. Sol kezde Qazaqstanda túbegeıli ózgeristerdiń myqty tulǵasyz jáne tıimdi basqarý ınstıtýtynsyz iske asýy múmkin emes edi, dedi ol.
Sonymen qatar, rektor qazirgi ýaqytta prezıdenttik basqarý nysany birtindep túrlene otyryp, Parlamenttiń jáne bıliktiń basqa da tarmaqtarynyń ókilettikterin kúsheıtýge baǵyt alǵanyn atap ótti. «9 maýsymǵa belgilengen prezıdenttik saılaý elimizde bastalǵan demokratııalyq reformalardyń jalǵasýyn kórsetedi», dedi A.Edrısov.
Konferensııaǵa qatysýshylar Tuńǵysh Prezıdent Nursultan Ábishuly Nazarbaev bastamashy bolǵan jáne júzege asyrǵan orasan zor ózgeristerdiń Qazaqstandy búkil álemge tanymal jáne Ortalyq Azııa aýmaǵynyń kóshbasshysy bolǵanyn qamtamasyz etkenin atap ótti.
Qaırat ÁBILDA,
«Egemen Qazaqstan»