«Bul kórsetkishterge qurylys jumystarynyń esebinen qol jetkizildi. Al bıyl qurylys jumystarynyń azaıýyna baılanysty ınvestısııa kólemi de tómendep otyr. О́ıtkeni ınvestısııa qurylymynyń 70-80% qurylys salasy quraıdy. Biz ótken jyldardaǵy ınvestısııalarǵa taldaý jasap, 2019 jylǵa arnalǵan boljamdyq kólemderdi jınap Jospar qurdyq. Eger ony oryndasaq, byltyrǵy kórsetkishke, ıaǵnı ınvestısııalar kólemin trıllıon teńgege qol jetkize alamyz», – dedi qala ákimi Baqyt Sultanov «Investısııalardy tartý máseleleri» taqyrybynda ótken Úkimet otyrysynda.
Jalpy qala basshylyǵy qalanyń ınvestısııa tartý ádisterin qaıta qaraǵan. Ákimniń aıtýynsha, Halyqaralyq qarjy ortalyǵynda qurylǵan ekojúıe - biregeı quqyqtyq rejımi bar jalǵyz alań. Ol qaýipsiz ınvestısııalaýǵa barlyq jaǵdaı jasap jatyr.
«Sondyqtan Halyqaralyq qarjy ortalyǵymen birlesip ınvestısııa tartý boıynsha Jol kartasyn ázirledik», – dedi ol. Qazir qalada ınvestorlardyń máselelerin tez arada sheshetin «Astana Invest» arnaıy uıymy jumys isteıdi («bir tereze» qaǵıdasy boıynsha). Investısııa tartý jumystarynda sınergııa qurý maqsatynda Halyqaralyq Qarjy ortalyǵynyń aýmaǵynda «Astana Investtiń» front-keńsesi ashylady.
«Jalpy bizde jumys barysynda somasy 3 trln teńge shamasyndaǵy 200-den astam joba bar, onyń 45-i shetel ınvestorlary men transulttyq korporasııalardyń qatysýymen iske asýda. Bıyl atalǵan jobalardan 120 mlrd.teńge ınvestısııa túsedi dep kútilýde», – dedi B. Sultanov. Qala ákimi, arnaıy ekonomıkalyq aımaqtyń aýmaǵyn 8 myń gektarǵa keńeıtý qajet ekendigin aıtty.
«Osy jerlerge kelgisi keletin áleýetti ınvestorlar bar, onyń ishinde 10 iri kompanııa 430 mlrd teńge somasyndaǵy Kóp fýnksıonaldy turǵyn úı keshenderiniń qurylysyn bastaýǵa daıyn. Tek osy jobalardan bıyl 100 mlrd teńge ınvestısııa tartýǵa bolady», – dedi qala ákimi. Ýákiletti memlekettik organdarmen birlesip elordanyń halyqaralyq kóliktik qoljetimdiligin qamtamasyz etý baǵytynda jumys júrgizilýde. «Áýe qoljetimdilik – Nur-Sultan qalasyn óńirdegi aldyńǵy qatarly qarjy ortalyqtarynyń biri retinde jaıǵastyratyn basty faktor. Iri qarjy astanalary arasyndaǵy turaqty tikeleı reıster shetel ınvestorlary men týrısterdiń kelýin arttyrady. Elbasynyń tapsyrmasyna sáıkes AQSh, Japonııa, Eýropa, Taıaý Shyǵys jáne Azııa elderimen turaqty tikeleı áýeqatynastaryn ornatýdy ári qaraı jalǵastyrý qajet», – dep atap ótti B. Sultanov.