Teatrdyń baspasóz qyzmetiniń habarlaýynsha, rejısser Andrea Bernardtyń máńgilik mahabbat hıkaıasyna degen jańa kózqarasy astanalyq óner súıer qaýymdy tańǵaldyryp, kóńilin baýrap aldy. Eıfel munarasy, ot shashqan átkenshekter men sahnany aınala júrgen ómirdegideı ólshemdermen jasalǵan poıyz zalda otyrǵandardy shattyqqa bóledi. Premera QR Mádenıet jáne sport mınıstrliginiń qoldaýymen ótti.
Úzdik qazaqstandyq ártister men álemge tanymal ári suranysqa ıe klassıkalyq óner metrleriniń jumysy qoıylymdy tabysty etti.
Olardyń biri – maestro Djýzeppe Akýavıva. Ol – Pýchchını operalary boıynsha áıgili maman. «Astana Opera» Sımfonııalyq orkestriniń oryndaýyna qaraǵanda, dırıjer partıtýranyń barlyq nıýansyn mýzykanttardyń kókeıine jetkize bilgen.
Álemdik deńgeıdegi maıtalman, «Dostyq» ordeniniń kavaleri, zamanymyzdyń kórnekti ssenografy Esıo Frıdjerıo teatrymyzǵa taǵy bir jaýharyn tartý etti. Aýqymdy kópdeńgeıli dekorasııalar arqyly kórermender birde qubyrlar qorshaǵan ıesiz qalǵan zaýytqa, birde sán-saltanatty Parıj jármeńkesiniń kóńil-kúıine bóleıtin jarqyraǵan alańǵa, birde qar jamylǵan temirjol beketine saıahat jasap, romantıkaǵa bóledi.
Ártister osy kórinisterdiń árbireýine jaǵdaıy beıshara bolǵanymen, rýhanı turǵydan baı bogemalyq jasampazdardyń rýhyn sińire bildi.
Solıster lırıkalyq jáne dramalyq epızodtarda keremet dýetter shyǵardy. Ár kúnderi: Mımı – Marııa Mýdrıak pen Maıra Muhamedqyzy, Rýdolf – Medet Chotabaev pen Jan Tapın Pýchchınıge tán vokal stılin tamasha meńgergendigin pash etti.
Saltanat Ahmetovanyń, Alfııa Karımovanyń (Mıýzetta) jáne Súndet Baıǵojınniń, Talǵat Musabaevtyń (Marsel) oryndaýyndaǵy ári kúldirgi, ári dramalyq sahnalyq kórinister kórermenniń kózderderine jas keltirdi.
Kollen partııasyn oryndaýshy – Taıyr Táji, Bolat Esimhanov; Shonar partııasyndaǵy – Andreı Borısenko, Erjan Saıypov óz únderimen, baı tembrlik boıaýlarymen, sondaı-aq vokaldyq tehnıkalarymen tyńdarmandardy baýrap aldy. Beıimbet Tańaryqov pen Ramzat Balakıshıev – Parpınol patııasyn akterlik turǵyda sátti oryndap shyqty. Samat Jarylqasynov pen Bahtııar Omarov Keden serjanty rólinde óner kórsetti.
Meıram kórinisine kásibı sırk ártisteri qatysty.
«Oskar» syılyǵynyń ıegeri Franka Skýarchapıno keremet kostıýmder jasap shyǵarǵan. «Astana Opera» bas hormeısteri Erjan Dáýitov jetekshilik etken hor tańǵalarlyqtaı mánerli estildi. Balalar horynyń jetekshisi Altynǵanym Ahmetova jáne hormeıster Aıgerim Makıbaeva jetekshilik etken Balalar stýdııasy jas ártisteriniń jumysyn jeke atap ótken jón.
Elorda kórermenderi kórnekti ıtalıandyq kompozıtordyń máńgi óshpes operasynyń jańa qoıylymyn súısine qabyl aldy.