ISLAMDYQ QARJYLANDYRÝDYŃ TIIMDILIGI

Astanada “VIProMotion”, “Istisna Corporation” agenttikteriniń uıymdastyrýymen jáne Indýstrııa jáne jańa tehnologııalar mınıstrigi men “Qazaqstannyń Damý banki” AQ-tyń qoldaý kórsetýimen ıslamdyq qarjylandyrý taqyrybyna arnalǵan halyqaralyq konferensııa ótti. Onda elimizde ıslamdyq “Al Hilal” bankin ashý, Qarjy mını­str­liginiń sýmýk atty ıslamdyq baǵaly qaǵazdardy shyǵarý týraly usynysyn, ıslamdyq qarjylan­dy­rý týraly zańǵa engizilgen soń­ǵy ózgeristerdi talqylaý, Islam banki men “Qazaqstannyń Damý banki” AQ arasynda birlesken bank qurý, ıslamdyq qarjylan­dy­rý kózderin paıdalana otyryp, ınvestısııalyq jobalardy iske asyrý máseleleri qaraldy. Onyń jumysyna Premer-Mı­nıstr Kárim Másimov qaty­syp, sóz sóıledi. Budan basqa jı­yn­da ıslamdyq qarjylandyrý júıe­siniń mańyzdylyǵy jóninde Qazaqstan tarapynan Vıse-premer – Indýstrııa jáne jańa tehnologııalar mınıstri Áset Isekeshev, Qarjy mınıstri Bolat Jámishev, meımandar jaǵynan Bahreın Úkimeti basshysynyń ekonomıkalyq máseleler jónin­degi keńesshisi Abdýlla Hasan Saıf, Islamdyq qarjylandyrý qyzmeti jónindegi keńestiń bas hatshysy Rıfat Ahmed Abdel Karım syndy osy salanyń belgili mamandary óz oılarymen bólisti. Kárim Másimov qazir elimizde ıslamdyq qarjylandyrý másele­sin engizý úshin barlyq múmkin­dik­ter qarastyrylyp otyrǵanyn, TMD boıynsha tek Qazaqstan ǵana qarjylandyrýdyń osy júıesine alǵash ret qyzyǵýshylyq tanytyp jatqanyn, soǵan dálel retinde bú­ginde Úkimet atalǵan júıeni to­lyǵymen endirý maqsatynda ıns­tıtýttyq ortany qalyptastyrýǵa basa mán berip otyrǵanynan ha­bar­dar etti. Osyǵan oraı  ol ıs­lamdyq qarjylandyrýda basshy­lyq­qa alynatyn sharıǵat qaǵı­dat­tary Qazaqstannyń ekonomıkalyq damý ustanymymen sáıkes keleti­nin, elimizdegi qarjy saıasatynyń móldirligin qamtamasyz etý, ony sapaly basqarý, qarjy salasy men ekonomıkanyń naqty sektory arasyndaǵy baılanysta kórinip otyrǵanyn atap ótti. Osydan keıin sóz alǵan Vıse-premer – Indýstrııa jáne jańa teh­nologııalar mınıstri Áset Ise­keshev ıslam bankınginiń mańyz­dylyǵyn aıta kelip, elimizde jaqyn arada ıslamdyq “Al Hilal” bankiniń qurylatynyn, qazir onyń qujattaryn daıyndaý ju­my­sy júrgizilip jatqanyn aıtty. Al Qarjy mınıstri Bolat Jámi­shev óz sózinde ıslamdyq qarjy­landyrýdyń elimiz úshin strate­gııalyq mańyzdylyǵyna keńirek toqtalyp ótti. Onyń aıtýynsha, kóp­tegen elder ıslamdyq qarjy­landyrýdy engizýdi ekonomıkalyq maqsattylyq turǵysynan qaras­ty­rý­da. Islamdyq qarjy ınstı­týt­ta­rynyń ornyqty qarjylyq ál-aýqaty, bazalyq sıpattary, olar­dyń álemdik qarjylyq daǵdarys jaǵdaıyndaǵy turaqtylyǵy ıslam­dyq qarjylandyrýǵa jańa qyrynan qaraýǵa ıtermeleýde. Qazir, dedi ol osy oraıda, Fran­sııa, Ulybrıtanııa, AQSh, Oń­tústik Koreıa jáne basqa da elder qarjylyq-quqyqtyq júıelerin ıslamdyq qarjylandyrýmen baılanystyrýda. Konferensııada Bahreın Úki­meti basshysynyń ekonomıkalyq máseleler jónindegi keńesshisi Abdýlla Hasan Saıf, Islamdyq qarjylandyrý qyzmeti jónindegi keńestiń bas hatshysy Rıfat Ahmed Abdel Karım syndy osy salanyń belgili mamandary Qa­zaqstanǵa ıslamdyq qarjylan­dy­rý­dy engizý máselesin qoldaı­tyn­daryn jáne ol úshin qolda bar múmkindikterdiń bárin jasaı­tyndaryn atap kórsetti. Dastan KENJALIN.