«Sátbaev oqýlary» ótti

Ýnıversıtettiń ǵylymı jumystar jáne ınnovasııalar jónindegi prorektory Nurlan Erjanovtyń aıtýynsha, atalǵan ǵylymı konferensııanyń halyqaralyq mártebege ıe bolýy ýnıversıtet úshin zor maqtanysh. Qanysh aǵamyzdyń jolyn qýǵan jastar jyl saıyn 12 sáýirde dástúrli túrde jınalyp, ǵylymı maqalalaryn qorǵaıdy. 

Bıyl konferensııaǵa 2 myńǵa jýyq ǵylymı maqala kelip tústi. Ǵylymı konferensııanyń jumysy «Q.Sátbaev jáne onyń bilim berý men ǵylymdaǵy róli» atty taqyryptan bastalyp, fılologııa, tarıh, ólketaný, fılosofııa, saıasattaný, matematıka, ınformatıka, ekonomıka, medısına, aýyl sharýashylyǵy, mádenıettaný, pedagogıka, etnologııa jáne basqa baǵyttar boıynsha jalǵasyn tapty.

Ǵylymı sharaǵa oblys ákimi Bolat Baqaýov qatysty. Ýnıversıtet rektory Gaýhar Ahmetova qatysýshylarǵa sáttilik tiledi. Ýnıversıtet ǵy­ly­mı ortalyǵynyń habarlaýynsha, kon­fe­ren­sııa­ǵa Aqtóbe, Almaty, Nur-Sultan, Qaraǵandy, Qostanaı, Kókshetaý, Oral, Taraz jáne Reseı qalalarynan 1500-den astam maqala kelip túsken.

Ǵylymı materıaldar boıynsha 22 tom jınaq basyp shyǵaryldy. Ýnıversıtet ótkizip kele jatqan «Sátbaev oqýlaryna» 17 jyl ara­ly­ǵyn­da 35 myńǵa jýyq jas ǵalym men daryndy oqýshylar qatysqan. 2001 jyldan beri 222 tomǵa jınaqtalǵan 19 myńnan astam maqala jaryq kórdi. Ár konferensııanyń kún tártibinde kásibı negizdelgen jaýaptardy talap etetin jańa máseleler qarastyrylady. Oblys ortalyǵyndaǵy №16 mektep lıseı­diń muǵalimi Aıjamal Slanbek­­qy­zynyń oqýshylary jyl saıyn halyqaralyq «Sátbaev oqýlary» ǵylymı konferensııasyna qatysyp, jeńimpaz atanyp júr. Aıjamal Bataeva jalpy bilim beretin mektepterdiń 8-9-sy­nyp­taryna fızıka pánin tereń­de­tip oqytý baǵdarlamasynyń avtory, sonymen qatar 5-synyptarǵa jaratylystaný pánin fızıka ǵylymynyń teorııalyq elementteri arqyly oqytý baǵdar­lamasynyń avtory. О́tken jyly «Kóshbasshy pedagog-2018» ataǵyn ıelenip, D.Qonaev atyndaǵy tósbel­gi­men marapattaldy.

Al Baıanaýyl aýdanyndaǵy Toraıǵyr orta mektebiniń tarıh páni muǵalimi Baqytgúl Ahmetovanyń aıtýynsha, Sátbaev oqýlaryna qatysqan 9-synyp oqýshysy Nazerke Serikbaı «Toraıǵyr óńirinde jylqy malyn ósirýdiń tıim­di­ligi», al 7-synyp oqýshysy Aıym Egintaı «Qazaq kóshiniń túrleri men erekshelikteri» jóninde ǵylymı jumys jazypty. 

Akademııa prezıdenti, tehnıka ǵy­lymdarynyń doktory Nurlan Ryspa­nov­tyń qatysýymen oqý orynda «Taý-ken ǵylymdary ulttyq akademııasynyń» fılıaly ashyldy. N.Ryspanovtyń aıtýynsha, ýnıversıtet ǵalymdarynyń maqsaty – jergilikti kásiporyndardyń básekege qabiletti bolýyna, ónimniń ózindik qunyn azaıtýǵa arnalǵan ınnova­sııa­lyq jobalardy ázirleý. Sonymen birge ortalyqtyń tehnıkalyq bilim alatyn stýdentterge de esigi ashyq. Ǵylym qýǵan, ınnovasııa tilin biletin bilimdi jastar – el bolashaǵy. 

Bar ǵumyryn ǵylym men bilim­ge arnaǵan Qanysh atalarynyń qurme­tine arnalǵan ǵylymı jıyn jas ǵalym­dar­­dyń ǵylym salasynda jańa­lyq ashýlary­na ashylǵan jol.  Pavlodar oblysy