Atalǵan semınarda Almatydan kelgen Social Farm turaqty eginjaı ortalyǵynyń mamandary dáris ótti. Negizgi maqsat – memlekettik qoldaý baǵdarlamalaryn túsindirý jáne zamanaýı tehnologııalarmen tanystyrý. Májiliske qaladaǵy jáne túrli kooperatıvterdiń músheleri jáne qala turǵyndary qatysty.
Búgingi tańda shaharda 62 myń gektar aýyl sharýashylyǵy baǵytyndaǵy jer bar. Osy aýmaq ishinde qalada 48 kooperatıv qurylǵan. Endigi másele qaıta óńdeý salasyn damytý basty nazarda deıdi sala mamandary.
Semınarda sóz alǵan «Shymkent qalasynyń aýyl sharýashylyǵy kooperatıvteri jáne ónim óndirýshileri» qaýymdastyǵynyń tóraǵasy Erkin Satqanbaevtyń pikirinshe Shymkentte et óndirý, baý-baqsha, kókónis ósirýge basymdyq berilip otyr. 6-8 sottyq jeri bar qala turǵyny eń aldymen óziniń otbasyn qamtamasyz etý kerek. Ol úshin túrli tehnologııalardy úırenip aýlasyna kókónis ósirgen jón.
Qalalyq aýyl sharýashylyǵy kooperatıvteriniń áleýetin arttyrý úshin qaıta óńdeý salasyna kóńil bólip, aýyl sharýashylyǵy beldeýin quryp, halyqty azyq-túlikpen qamtamasyz etýge bolady, deıdi qaýymdastyq tóraǵasy.
Qazirgi tańda shaharda aýyl sharýashylyǵyn damytý konsepsııasy daıyndalyp, strategııasy da jasalǵan. Endigi maqsat 136 gektar aýmaqty qamtıtyn agro-ındýstrıaldy aımaq qurýǵa kúsh salý.
Qýantarlyǵy, isker azamattar úshin agro-ındýstrıaldy aımaqtan tegin jer berilip, sharýashylyqqa ketken shyǵynnyń 25 paıyzyn úkimet ótep bermek.