Bul týraly Aqordanyń baspasóz qyzmeti habarlady.
Memleket basshysyna metaldy myrysh, tazartylǵan qorǵasyn, altyn men kúmis, katodty mys sııaqty shyǵarylatyn ónimderdiń tizimi usynyldy. Zaýyttyń óndiristik qýaty jylyna 305 myń tonna myrysh, 168 myń tonna qorǵasyn, 70 myń tonna mys, 47 tonna altyn jáne 1440 tonna kúmis óndirýge qaýqarly.
Qasym-Jomart Toqaev eńbek ujymymen áńgimelesý barysynda «Qazsınk» jaýapkershiligi shekteýli seriktestiginiń Qazaqstan tústi metallýrgııasynyń flagmany jáne iri eksporttaýshysy ekenin atap ótti.
– Sizderdiń kásiporyndaryńyz О́skemen men búkil Shyǵys Qazaqstan oblysynyń bıýdjetin qalyptastyrýǵa jáne áleýmettik salasyn damytýǵa zor úles qosyp keledi. «Qazsınk» óz jumysshylaryna kómektesip qana qoımaı, sondaı-aq, qoǵam úshin mańyzdy jobalardy júzege asyrýǵa atsalysady. Bul – bıznestiń joǵary áleýmettik jaýapkershiliginiń jáne óńirdiń barlyq turǵyndary úshin qolaıly orta qalyptastyrýǵa degen nıetiniń dáleli, – dedi Qazaqstan Prezıdenti.
Kezdesý sońynda Memleket basshysy «Qazsınk» jaýapkershiligi shekteýli seriktestiginiń eńbek ujymyna baq-bereke jáne tabys tiledi.