О́ńir basshysy qaraǵandylyq hokkeıshilerdiń tolaǵaı tabysy oblys qana emes, jalpy elimiz úshin aıtýly oqıǵa ekenin atap ótti.
– Bizge Qazaqstannyń túpkir-túpkirinen qońyraý shalyp, quttyqtaýdy qarsha boratyp jatyr. Men ózim qalamyzda ótken barlyq fınaldyq oıyndarda jankúıer boldym. Esimde qalǵan bir jarqyn sátti atap aıtqym kelip otyr. Kezekti matchtyń birinde Maksım Kısynnyń tizesine shaıba tıgende, tóreshi oıyndy toqtatpaǵan edi. Sol kezde oıynshymyz komandasy azshylyqta qalmas úshin bar kúshin jıyp, bortqa deıin súıretilip bardy. Sol kezde kommentator Maksımdi «jaraqat alǵan partızanmen» salystyrǵan bolatyn. Sol sát este qalardaı keremet boldy, – dedi óńir basshysy.
Sondaı-aq, oblys ákimi bapkerler quramy men oıynshylarǵa alǵys aıtyp, hokkeı klýbyna jańa jeńister tiledi.
«Saryarqa» komandasynyń bas jattyqtyrýshysy Leonıd Tambıev oblysta hokkeı sportyn damytýǵa baǵyttalǵan jumystarǵa rızashylyq sezimin bildirdi. Sonymen qatar, qaramaǵyndaǵy hokkeıshilerdiń jeńiske degen jigeri men qulshynysyn oryndy maqtan etti.
– Bapkerlerdiń arasynda jattyqtyrýshy degen Gollıvýdtaǵy zulym sııaqty qorqynyshty, biraq naǵyzdyń ózi bolýy kerek degen sóz bar. Meniń oıymsha, jigitter – sózsiz batyrlar, olar jaraqattary jáne synyqtaryna qaramastan jankeshti, adal jáne naǵyz oıyn kórsete aldy, – dedi L.Tambıev.
Kezdesý sońynda «Saryarqa» hokkeı klýbynyń ujymy jan-jaqty qoldaý kórsetkeni úshin oblys ákimine altyn medal tabys etti. Al sporttaǵy jetistikteri men óńirdiń damýyna qosqan úlesi úshin klýbtyń barlyq músheleri oblys ákiminiń «Qurmet gramotasymen» marapattaldy.