Birden aıta keteıik, juma kúngi keshte osy oıyndy tamashalaý úshin «Almaty Arenaǵa» 12 090 kórermen jınaldy. Bul – fýtzaldan klýbtar arasyndaǵy jarystardyń rekordtyq kórsetkishi! Buryn-sońdy dál osynsha kóp adam bir ǵana oıyndy tamashalaý úshin sport keshenine jınalǵan emes.
Matchtyń birinshi taımynda kórermender soǵylǵan goldy kóre alǵan joq. Esesine, úzilisten keıin qos qaqpaǵa jeti birdeı dop soǵyldy. Almatylyqtar qarsylastar qaqpasyn bes márte dál kózdese, qonaqtar eki rát mergendik tanytty. Esep – 5:2. «Qaırattyń» oıynshylary arasynan Hosseıın Taıebı dýbl avtory atansa, Djon Lennon, Edson jáne Dýglas bir-bir retten dopty torda týlatty.
Kelesi jartylaı fınaldyq oıynda Portýgalııanyń «Sportıngi» Ispanııanyń «Inter-Movıstar» klýbyn 5:3 esebimen utty. Osylaısha, byltyrǵy jylǵy chempıon óz tuǵyrynan taıdy.
Búgin «Almaty Arenada» ek kezdesý ótedi. Nur-Sultan ýaqyty boıynsha 17:30-da «Barselona» men «Inter-Movıstar» úshinshi oryn úshin talasady. Al 20:00-de «Qaırat» pen «Sportıng» bas júldeni ózara sarapqa salady.