Keń aýqymdy ekspedısııaǵa bıznes-qurylym, zııaly qaýym ókilderi, otandyq shoý-bıznes juldyzdary, blogerler jáne BAQ ókilderi, barlyǵy 1000 adamdaı qatysty.
Ekspedısııany qorytyndylaý jáne jabylýyna oraı Saýran qalashyǵynyń aýmaǵynda ótken sharaǵa qatysqan Mádenıet jáne sport mınıstri Arystanbek Muhamedıuly aıryqsha mańyzǵa ıe bastamanyń sátti júzege asýymen quttyqtady.
- Búgingi shara babalarymyzdyń ǵasyrlar boıǵy murasynyń qazirgi tańdaǵy ózektiliginiń keremet kórinisi. «Nomad Explorer» ekspedısııasyna qatysqan barlyq qazaqstandyqtarǵa alǵys aıtamyn. Bizdiń keń-baıtaq súıikti Otanymyz jańa qyrynan ashylyp, júrekke jylý beretin jerler kóbeıgenine senimdimin, - dedi Arystanbek Muhamedıuly.
Túrkistan oblysyndaǵy Saýran qalashyǵynda tuńǵysh ret uıymdastyrylǵan ekspedısııalyq joba alys-jaqyn sheteldik týrısterdi tartýǵa jasalǵan serpindi qadamdardyń biri. Osy oraıda, mınıstr ortaǵasyrlyq qalanyń tarıhyn nasıhattaýǵa arnalǵan jobany qolǵa alyp, júzege asýyna tikeleı atsalysa otyryp, joǵary dárejede uıymdastyrǵan kásipker Marǵulan Seısembaev, BI Group qurylys holdınginiń basshysy Aıdyn Rahymbaev pen belgili rejısser Aqan Sataevtarǵa alǵys aıtty.
О́z kezeginde ekspedısııa uıymdastyrýshylary da Túrkistanǵa kelgen saıahatshy topty nazardan tys qaldyrmaı arnaıy kelgen mınıstrge rııasyz yqylastaryn bildirdi.
Tarıhı kórinispen daıarlanǵan konsert sahnasy men samannan jasalǵan kórermen oryndyqtary, «Turan» folklorlyq-etnografııalyq ansambli men basqa da óner ıeleriniń qatysýymen ótken THE SOUL OF NOMADS festıvali jıynǵa qatysýshylarǵa erekshe áser syılady.
Halyqaralyq sharada «Taıqazan» gastronomııalyq festıvali, kókpar, ulttyq oıyndar, jylqy men túıege minip júrý, áýe sharlary shoýy, UNISEF - The Garden of Nomads qatysýymen Nomadtar Baǵynda 500 kóshet otyrǵyzý sharalary ótti.