Árbir úsh jyl saıyn ótetin basqosýdyń maqsaty – túbi bir túrkiler týystyǵy, ádebıet pen jýrnalıstıka, jas urpaq tárbıesi týraly oı qozǵaý, rýhanı baılanysty tereńdetý. «Rýhanı jańǵyrý» baǵdarlamasy aıasynda ótkizilgen bıylǵy basqosý qazaq jáne ózbek halqynyń Sherhan Murtaza men Nasyr Fazyl syndy sóz zergerleriniń shyǵarmashylyǵyna arnaldy. «Marhabat-Mıras» qoǵamdyq qory men Túlkibas aýdany ákimdigi qolǵa alǵan bastamaǵa Túrkistan oblysy ákimdigi qoldaý kórsetti.
Jıynǵa ardagerler, zııaly qaýym ókilderi, Qazaqstan, Túrkııa, О́zbekstan memleketteriniń qalamgerleri, buqaralyq aqparat quraldary ókilderi jáne shyǵarmashyl jastar qatysty. Qatysýshylar aldymen Túlkibas aýdanynyń ortalyǵyndaǵy Turar Rysqulov eskertkishine gúl shoǵyn qoıyp, Túrkibasy áýlıe kesenesine aıaldady. Odan soń Taýpistelidegi Sherhan men Nasyr baýyna jınaldy.
Jıyndy jazýshy, halyqaralyq «Alash» ádebı syılyǵynyń laýreaty Baıǵut Marhabat júrgizdi. Túrkistan oblysy ákiminiń orynbasary ári ádebıet salasynyń ókili Málik Otarbaev jıynǵa arnaıy qatysyp, oblys ákimi О́mirzaq Shókeevtiń quttyqtaý hatyn tapsyrdy. Ádebıet pen rýhanııat salasyna qoldaý kórsetiletinin, mundaı basqosýlardyń jas urpaq úshin bereri mol ekenin jetkizdi.
Túlkibas aýdanynyń ákimi Nurbol Turashbekov tabıǵaty tamyljyǵan Túlkibasqa ádebıetshilerdiń kelgenine qýanyshty ekenin bildirdi.
Taǵylymdy kezdesýde Qazaqstan Jazýshylar odaǵy basqarmasynyń hatshysy, Memlekettik syılyqtyń laýreaty Esenǵalı Raýshanov, О́zbekstan Jazýshylar odaǵy qazaq ádebıeti keńesiniń hatshysy, jazýshy, aýdarmashy Mehmanqul Islamqulov, Qazaqstannyń Qurmetti jýrnalısi Baıdýlla Qonysbek, Túrkııa Respýblıkasynyń ókili, belgili ǵalym Q.A.Iаsaýı atyndaǵy HQTÝ-dyń túrik fılologııasy kafedrasynyń meńgerýshisi Asyl Shengún, halyqaralyq «Alash» syılyǵynyń laýreaty, K.Sımonov medaliniń ıegeri Narmahan Begalyuly jáne Nesipbek Dáýtaıuly jáne ózge de aqyn-jazýshylar qos qalamger jaıly tolǵanystaryn, qoǵam, ádebıet, rýhanııat týraly keleli oılaryn aıtty. Ádebıet, jýrnalıstıka jaıly usynystaryn, jas talanttar týraly oı-pikirlerin bildirdi.
Áserli júzdesýde qalamger aǵalar ádebıetke qadam basqan jastarǵa bata berip, aq jol tiledi. Basqosý barysynda Sherhan Murtaza men Nasyr Fazyldyń shyǵarmalarynan úzindiler usynylyp, konserttik baǵdarlamamen súıemeldendi. Ádebı jıyn sońynda qalamgerler Boztorǵaı asýyna saıahat jasady.