Uıymdastyrýshylardyń sózinshe baıqaýdyń basty maqsaty qazaq tilin kreatıvti oqytýdyń úzdik ádis-tásilderin anyqtaý, qazaq tilin kreatıvti oqytýdyń biryńǵaı bazasyn daıyndaý, memlekettik tildi úıretýdiń erekshe jáne qalyptan tys tásilderin BAQ arqyly kópshilikke nasıhattaý.
Baıqaýǵa respýblıkamyzdyń ońtústik, soltústik, ortalyq, shyǵys jáne batys óńirlerinen, atap aıtqanda Nur-Sultan, Shymkent, Almaty, Taldyqorǵan, Semeı, О́skemen, Petropavl, Pavlodar, Qostanaı, Kókshetaý, Qaraǵandy, Atyraý, Oral syndy qalalardyń bilim ordalarynan jalpy sany 43 bilikti de tájirıbeli oqytýshylar men ustazdar qatysqan.
Sharanyń birinshi kezeńinde qatysýshylar qazaq tilin kreatıvti oqytýda qoldanatyn ádis-tásilderi usynylǵan vıdeo sabaqtaryn feısbýk áleýmettik jelisinde jarııalap, ekinshi kezeńge joldama alý múmkindigine ıe boldy. Ekinshi kezeńge ótkender 18 sáýir kúni belgili bir taqyryp boıynsha esse jazý saıysynda óz baqtaryn synady. Baıqaý nátıjesi boıynsha qazaq tilin kreatıvti oqytýdyń úzdik ádis-tásilderi men ınnovasııalyq ıdeıalar usynǵan jáne esse jazýda joǵary nátıje kórsetken jeńimpazdar anyqtalyp, túrli dárejeli dıplomdarmen, syılyqtarmen, sondaı-aq «Úzdik esse», «Úzdik ádisker», «Kreatıvti muǵalim», «Jańashyl pedagog», «Úzdik vıdeo», «Ustaz brendi», «Jaqsy sóz – jarym yrys» nomınasııalary boıynsha marapattaldy.
Baıqaýdyń bas demeýshisi «Vodometr» JShS is-sharanyń ótýine qarjylaı qoldaý kórsetse, Mádenıet jáne sport mınıstrligi Til komıteti, Shaısultan Shaıahmetov atyndaǵy «Til-Qazyna» ulttyq ortalyǵy, Nur-Sultan qalasy Tilderdi damytý jáne arhıv isi basqarmasy, Memlekettik tildi damytý qory qundy syılaqtarymen demeýshilik etken.
Eki kezeńdik saıystan turatyn baıqaý qorytyndysy boıynsha I oryndy Semeı qalasy M.Áýezov atyndaǵy pedagogıkalyq kolledjiniń oqytýshysy Sara Qalıeva ıelense, II oryndy Nur-Sultan qalasy №53 mektep-lıseıiniń muǵalimi Gúlzat Turǵynqyzy jáne Atyraý qalasy №13 mektep-gımnazııasynyń muǵalimi Tursyngúl Ǵarıfollaqyzy, al III oryndy «Nazarbaev Zııatkerlik mektepteri» derbes uıymynyń Nur-Sultan qalasyndaǵy halyqaralyq mektebiniń muǵalimi Indıra Ábilhanqyzy, Qaraǵandy qalasyndaǵy Nazarbaev Zııatkerlik mektebiniń muǵalimi Meıramgúl Meırashqyzy jáne Nur-Sultan qalasyndaǵy Zııatkerlik mektebiniń muǵalimi Amangúl Pirimjanqyzy qanjyǵalaryna baılady.
Raýan Qaıdar