Sol surapyl soǵystyń qasiretin kórgender de sıredi. Besikten beli shyqpaı jatyp tylda aýyr eńbek etken urpaqtyń ózi de azaıdy. Sondyqtan qanshama taýqymet pen qaıǵy ákelgen osy jeńistiń qadirine jetpeıtin, 9 mamyr merekesine jaıbaraqat qaraıtyn jastarǵa bul kúnniń mánin aýyq-aýyq eske salyp turý paryz. Keıde sózben aıtyp jetkize almaıtyndy bir ǵana sýret sóılete alady. Al myna beıne osydan 40 jyl buryn túsirilipti.
– Myna sýretti 1979 jyly Qyzylorda oblysy Shıeli aýdany Sulýtóbe, qazirgi Mustafa Shoqaı aýylynda túsirdim. Birde týǵan aýylyma jolym túsip, Sulýtóbege barsam, eskertkishke tesile qarap, bir áıel jylap tur eken. Eki kadr túsirýge zorǵa úlgerdim. Bir jaǵynan bireý jylap turǵanda, meniń sýretke túsirip jatqanym da yńǵaısyz kórindi. Alaıda bul kórinisti kórgende tolqymaý múmkin emes edi. Ol kezde soǵys jesirleriniń kóbiniń kózi tiri edi.
Osy fotodan soń «Soǵys jesirleri» degen serııamen sýretter túsire bastadym. Eki jyl boıy maıdannan azamaty oralmaǵan sheshelerimizdi túsirdim. Sonda deımin-aý, jesirler jylasa meniń de qosa jylaǵan ýaqyttarym boldy. Ol jerde shydaý múmkin emes.
Keıin 1983 jyly bul sýret Máskeýde ótken Qazaqstan fotoóneri sheberleriniń kórmesine qoıyldy. Biraq ózim ol kórmege bara alǵan joqpyn. Sýrettiń qyp-qyzyl bolyp turǵany, sol kezdegi túrli-tústi úldirmen túsirildi, – deıdi qyzylordalyq tanymal fototilshi Bolat Omarálıev.
Bolat Omarálıev áleýmettik jelide óziniń jerlesteri, Sulýtóbeniń adamdary barshylyq ekenin, bireý bolmasa, bireýi osy sýrettiń keıipkerin tanyr dep úmittenip, bul fotony áleýmettik jelige salǵan edi.
Talaı adamdy tolqytyp, talaı adamnyń kózine jas úıirgen osynaý sátti sýret áserli estelikterdiń tıegin aǵytqanymen, fotodaǵy ana tabylmady. Ol ulyn kútken ana ma álde jaryn saǵynǵan shermende sheshelerimizdiń biri me? Alaıda, biraz adam Uly Otan soǵysy qaldyrǵan qasiretti keıingi urpaqqa túsindirý úshin dál osyndaı fotolardy kórsetýdiń ózi jetkilikti ekenin jazypty.
Endi bireýler bala kezinde úıinde júretin 4 birdeı sulý kelinshektiń soǵystan oralmaǵan aǵalarynyń jarlary ekenin aıtady. Sol sııaqty bes birdeı ulynan aıyrylyp, bozdap ótken analardyń kóz jasyn jazady...
ALMATY