30-dan astam Azııa elderiniń joǵary laýazymdy ókilderi ekonomıkalyq yntymaqtastyqty keńeıtý jáne ǵylymı-tehnıkalyq almasýlardy tereńdetý máselelerin talqylady. Sondaı-aq, qatysýshylar sońǵy birneshe onjyldyqtar boıy álemniń basym óńirine aınalǵan jáne eleýli ósim qarqynyn kórsetip otyrǵan Azııa elderiniń arasyndaǵy dıalogty odan ári nyǵaıtý máselelerin qarastyrdy.
Forýmda sóz sóılegen qazaqstandyq delegasııanyń basshysy Qazaqstan Azııadaǵy ózara is-qımyl jáne senim sharalary jónindegi keńesti (AО́SShK) shaqyrýdyń bastamashysy, sondaı-aq birqatar azııalyq uıymdardyń belsendi múshesi ekenin atap ótti. Ol qatysýshylardy senim men yntymaqtastyqty odan ári nyǵaıtý úshin Azııa óńirindegi halyqaralyq uıymdardyń ózara is-qımylyn tereńdetýge shaqyrdy.
Qazaqstannyń ókili Azııalyq damý banki, Azııalyq ınfraqurylymdyq ınvestısııalar banki, Islam damý banki jáne basqa da qurylymdar sııaqty mamandandyrylǵan kontınentaldyq qarjy ınstıtýttaryn birlesken qyzmetke tartýdyń mańyzdylyǵyn basa aıtty.
Qazaqstandyq delegasııa «Shaǵyn jáne orta bıznes - ornyqty ekonomıkalyq órkendeýdiń jańa draıveri» atty AYD bıznes-forýmyna qatysty. Iskerlik baılanystar ornatylyp, qazaqstandyq iskerlik ortalardyń azııalyq áriptestermen yntymaqtastyǵyn nyǵaıtýǵa baǵyttalǵan ekijaqty kezdesýler ótkizildi.
Qazaqstan 2003 jyly Azııadaǵy yntymaqtastyq jónindegi dıalogtyń múshesi boldy. Bul halyqaralyq alań yntymaqtastyqtyń ártúrli baǵyttary boıynsha konsýltasııalar ótkizý, sheshimder qabyldaý men sharalardy júzege asyrýǵa arnalǵan kópjaqty forým bolyp tabylady. Qazaqstan AYD-ǵa qatysý arqyly otandyq kásiporyndardyń syrtqy ekonomıkalyq qyzmetine jáne ekijaqty ári kópjaqty qatynastardy nyǵaıtýǵa qolaıly jaǵdaılar jasaıdy. Energetıka, kólik jáne aýyl sharýashylyǵy salasyndaǵy yntymaqtastyqty damytýǵa erekshe nazar aýdarylady.