Tuńǵysh Prezıdent Nursultan Nazarbaev elorda turǵyndary men qonaqtary aldynda sóılegen sózinde barsha jurtty Qazaqstan halqynyń birligi kúnimen quttyqtady.
– Búgin keń-baıtaq Otanymyzdyń barlyq óńirlerinde kóktemniń jarqyraǵan merekesi – 1 mamyr – el birliginiń merekesin atap ótip jatyrmyz. Osy el birligi degen qasıetti uǵym men mereke barshamyzǵa qutty bolsyn, barshamyzǵa jaqsylyq pen qut bereke ákelsin dep tileımin. Elimizde ata-babamyzdan qalǵan «Birlik bolmaı, tirlik bolmas», «Tórteý túgel bolsa, tóbedegi keledi, altaý ala bolsa, aýyzdaǵy ketedi» degen naqyl bar. Osyny negizge alǵan halqymyz nebir qıyn-qystaý jaǵdaılardan ótip, keń-baıtaq dalamyzdy saqtap qalyp, bizge amanat etti. Osy birliktiń arqasynda biz táýelsiz Qazaqstandy quryp, ata-babanyń ańsaǵan amanatyn oryndadyq, – dedi Elbasy.
Elbasy odan ári yntymaq pen birliktiń arqasynda Máńgilik el uǵymynyń qalyptasqandyǵyn atap ótti.
– Qazaq halqy óz táýelsizdigi úshin qasyq qanyn aıaǵan joq. Sol qaǵıdaǵa adal bolaıyq, ata-babamyzdyń armanyn oryndaıyq. Osy jyldar ishinde jetken jetistikterimizdiń barlyǵy – eldiń birliginiń, halyqtar arasyndaǵy tynyshtyqtyń arqasy. Qazaqstannyń kópetnosty bolǵanyna eshkimniń jazyǵy joq. Sondyqtan qazaq halqy eldegi aýyzbirshilikke uıytqy bolyp, ózgelerge qamqorlyq kórsetip, mamyrajaı tirshilik etýdemiz, – dep atap ótti Tuńǵysh Prezıdent.
Elbasy zamanaýı Qazaqstan barlyq jetistikke qoǵamdaǵy birliktiń arqasynda qol jetkizgenine toqtalyp, beıbit ómir men turaqtylyqty baǵalaýǵa jáne saqtaýǵa shaqyrdy.
– Biz – baqytty halyqpyz. Birligimizdi saqtap, táýelsizdigimizdi qurmetteýimiz kerek. Damý baǵdarlamalarymyzdy júzege asyrý elimizdiń bolashaǵyn odan ári jarqyn ete túsedi, – dedi Tuńǵysh Prezıdent.
Nursultan Nazarbaev álemde etnosaralyq qaqtyǵystardyń saldarynan týyndaıtyn qazirgi zamanǵy syn-tegeýrinderge toqtaldy.
Rasynda, bolmysy, tili men dini basqa jurtshylyqtyń úni bir jerden shyǵyp, jahanǵa tatý-tátti tirshiliktiń úlgisi merekelik alańda kórinis tapty.
Osy merekelik is-sharanyń ortasynda júrgen, kúni keshe Qazaqstan halqy Assambleıasy Tóraǵasynyń orynbasary bolyp taǵaıyndalǵan elordalyq ózbek etnomádenı ortalyǵynyń basshysy Sherzod Pýlatovpen tildeskenimizde, ol elimizdiń damýyn osy birlikpen baılanystyra sóıledi.
– Qazaqstandaǵy tatý-tátti tirshilik pen birlik qazir jer-jahanǵa úlgi bolyp otyr. Barlyq etnostardyń bir anadan týǵandaı syılasyp, qıynshylyqtardy birge eńserýimiz dosty qýantyp, dushpandy kúıindiredi. Solaqaı saıasattyń saldarynan qazaq jerine kúshpen kóshirilgen ulttardyń ókilderine qazaq halqy pana bolyp, bir japyraq nanymen bólisip, aman saqtap qaldy. Dini, dástúri bólek jandardy qushaǵyna alyp, baýyryna basty. Mine, qazirgi ýaqytta Elbasynyń arqasynda elimizdegi tirlik baıandy bolyp, elimiz órkendep keledi, – dedi Sh.Pýlatov.