Búginde onyń aldyńǵy tizbeginde Eýrazııalyq top (Eurasian Resources Grop) kásiporyndary tur. Bul tabıǵı resýrstardy óndirý men óńdeý energetıka, logıstıka jáne marketıng salalary boıynsha álemdegi ártaraptandyrylǵan jetekshi kompanııalardyń biri ekenin aıta ketken jón. Tórt qurlyqtaǵy 15 elde ornalasqan top kásiporyndary óz salalary boıynsha iri jumys berýshiler bola bilýimen erekshelenedi. Elimizdegi joǵary markaly alıýmınıı óndiretin balamasy joq jalǵyz kásiporyn da Eýrazııalyq toptyń quramynda ekeni málim. Mys pen kobalt óndirý men óńdeý isinde de ERG-dyń úlesi joǵary. Sondaı-aq búkilálemdik ekonomıkalyq forým tuǵyrnamasynda qurylǵan akkýmýlıatorly batareıalar sektoryna arnalǵan jahandyq alıanstyń quryltaıshy-seriktesi bolýy da onyń zor áleýetin ańǵartady.
Transulttyq kompanııa quramyndaǵy «Qazhrom» AQ metallýrgııa, taý-ken isi, qurylys, avtomobıl jáne jol qozǵalysyn uıymdastyrý mamandyqtary boıynsha Q.Jubanov atyndaǵy Aqtóbe óńirlik memlekettik ýnıversıtetiniń 50 túlegin qyzmetke alý jóninde sheshim qabyldady. Kompanııanyń prezıdenti Arman Esenjolovtyń aıtýynsha, ekijaqty kelisimge sáıkes túlekterdi jumysqa qabyldaýdyń arnaıy baǵdarlamasy jasalǵan. Artyqshylyǵy, aqysy tólenetin tálimgerdiń taǵaıyndalýy. Onyń basty qyzmeti – jas kadrlardy óndiristik tájirıbege baýlý. Buǵan qosa túlekterdi jumysqa ornalastyrý, olardyń qyzmette ósý men órleý joldarynyń josparyn ázirleý jáne kadrlar legi men rezervin engizý jóninde de tıisti is-sharalar belgilengen.
– Biz joǵary óndiristik mejege kásibı biliktiligi joǵary mamandarǵa arqa súıegen jaǵdaıda ǵana jete alatynymyzdy jaqsy túsinemiz. Ári myńdaǵan adam qyzmet etetin irgeli kásiporynǵa maqsatker, órshil, talaby bıik, jaýapkershiligi joǵary jastardy qabyldaýǵa qashan da ázirmiz, dedi «Qazhrom» AQ prezıdenti Arman Esenjolov. Kompanııanyń eń basty qurylymdyq bólimi 4300 adam jumys isteıtin Aqtóbe ferroqorytpa zaýyty bolsa, onyń 800-den astamy Q.Jubanov ýnıversıtetiniń túlekteri eken. Bul – qyzmetkerlerdiń 20 paıyzy osy joǵary oqý ornyn bitirip, jumysqa ornalasqandar degen sóz, deıdi zaýyt dırektory Jalǵasbek Musabekov. Tipti Jalǵasbek Bereketulynyń da Jubanov ýnıversıtetiniń túlegi ekenin aıta ketelik. Ol 2002 jyly atalǵan joǵary oqý ornyn ınjener-metallýrg mamandyǵy boıynsha úzdik dıplommen aıaqtapty. Sodan soń eńbek jolyn osy óndiristik ujymda ferroqorytpa balqytý qyzmetinen bastap, óz sheberligi men biliktiligin kótere otyryp, kásiporyn basshysyna deıin kóterildi. Bul mysaldyń ózi de túlekterge oı salary anyq. Sondaı-aq óndiris jetekshilerimen oı-pikir almasý kezinde qyzmetke qabyldanǵan túlekter tıisti áleýmettik jeńildiktermen qamtylatyny jónindegi derekterge qanyqtyq. Bul olar úshin asa mańyzdy artyqshylyqtardyń biri bolmaq. Atap aıtqanda, medısınalyq saqtandyrý, tamaqtandyrý, arnaıy bólingen kólik pen turaqty mekenjaıy janynan jumysqa tasymaldaý jyl qorytyndysy boıynsha bonýstar berý, óndiris ereksheligine sáıkes kezekti eńbek demalysyna qosymsha kúnder qosý, sanıtarlyq-kýrorttyq kartalardy jeńildetilgen baǵamen usyný kiredi eken. Sondaı-aq Eýrazııalyq top quramyndaǵy kásiporyndarda qyzmetke qabyldanǵan jas kadrlardyń turǵyn-úı baǵdarlamasyna qatysý múmkindikteri joǵary ekeni de atap aıtýǵa turarlyq másele.
AQTО́BE