Qazaqstan Prezıdenti Q.Toqaev kezekten tys saılaý ótkizý týraly óz sózinde eldegi áleýmettik-saıası kelisimdi qamtamasyz etý jáne áleýmettik-ekonomıkalyq damý mindetterin sheshý úshin bolashaq saıası baǵytqa qatysty «belgisizdikti joıý kerek» ekenin atap kórsetti. Bul turǵyda úmitkerdiń qazirgi saıası baǵyttyń dáıektiligi men sabaqtastyǵyn qamtamasyz etý qabileti saılaýshylardyń negizgi ólshemi bolyp tabylady.
Kezdesý barysynda sarapshylar Qazaqstannyń ishki jáne syrtqy saıasatynyń negizgi aspektilerin qarastyryp, 2019 jylǵy 9 maýsymǵa josparlanǵan Qazaqstan Respýblıkasy Prezıdentiniń kezekten tys saılaýyn talqylady.
QSZI-dyń dırektory Zarema Sháýkenova aldaǵy saılaýdyń mańyzdylyǵyna toqtaldy. Onyń aıtýynsha, daýys berý nátıjeleri úmitkerdiń saılaýaldy baǵdarlamalarynyń negizinde Qazaqstannyń bolashaq damýyn anyqtaıdy.
Talqylaý barysynda Áleýmettik jumys jónindegi ulttyq resýrstyq ortalyqtyń dırektory Lázat Nurqatova barlyq qazaqstandyqtardyń ómir súrý deńgeıi men sapasyn kóterý úshin memlekettiń áleýmettik bastamalaryn jalǵastyrýdyń mańyzdylyǵy men birinshi kezektiligi týraly pikirin bildirdi. Sonymen qatar Ortalyq Azııa óńirindegi etnosaralyq jáne konfessııaaralyq qatynastardy zertteý ortalyǵynyń jetekshisi Aıgúl Sadýaqasova sóz sóılep, etnosaralyq jáne konfessııaaralyq birlik pen kelisimniń saqtalýy týraly másele memlekettik damýdyń mańyzdy aspektileriniń biri bolyp qala beretinin aıtty.
QSZI dırektorynyń orynbasary Sanat Kóshkimbaev elimizdiń syrtqy saıasaty týraly áńgimelep berdi. Onyń pikirinshe, saılaýdyń nátıjeleri elimizdiń syrtqy saıasatyna jańa serpin beredi jáne halyqaralyq arenadaǵy senimdi áriptes el retinde Qazaqstannyń bedelin nyǵaıtady.
Talqylaýǵa Azııalyq zertteýler ınstıtýtynyń dırektory Sultan Ákimbekov, «Qoǵamdyq pikir» zertteý ınstıtýtynyń jobalar jónindegi dırektory Botagóz Raqysheva, «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalıuly, Ulttyq ǵylymı-praktıkalyq ortalyq basqarmasynyń jetekshisi Anar Fazyljan, qoǵam qaıratkeri, bloger Ǵalym Baıtuq, ishki jáne syrtqy saıasat salasyndaǵy sarapshylar belsendi qatysty.