Atalǵan qaýly jobasyn tanystyrǵan Ortalyq saılaý komıssııasynyń hatshysy Sábıla Mustafınanyń aıtýynsha, prezıdenttikke kandıdat Amangeldi Taspıhov Almaty men Shymkentten basqa elimizdiń 15 óńirinen 122 770 azamattyń qolyn jınaǵan. Tekserý nátıjesinde 119 577 rastalǵan qol anyqtaldy.
Sonymen qatar A.Taspıhov kandıdat retinde tirkelý úshin Ortalyq saılaý komıssııasyna óziniń kiristeri men múlki jóninde deklarasııa, tirkeýge kedergi keltiretin aýrýlardyń joqtyǵy týraly medısınalyq qorytyndy tapsyrǵan. Osyǵan qaraı OSK Qazaqstan Respýblıkasy Prezıdentiniń kezekten tys saılaýynda Amangeldi Taspıhovty Qazaqstan Respýblıkasy Prezıdenttigine kandıdat retinde tirkeý týraly qaýly qabyldady.
«2019 jylǵy 9 maýsymǵa taǵaıyndalǵan Qazaqstan Respýblıkasy Prezıdentiniń kezekten tys saılaýynda Amangeldi Taspıhov Qazaqstan Respýblıkasy Prezıdenttigine kandıdat retinde tirkelsin; Prezıdenttikke kandıdat Amangeldi Taspıhovqa tıisti kýálik berilsin; Prezıdenttikke kandıdat Amangeldi Taspıhovtyń «Halyqtyq Jınaq Banki» aksıonerlik qoǵamyna arnaıy ýaqytsha shot ashý úshin tirkelýi týraly málimetter berilsin; buqaralyq aqparat quraldarynda Qazaqstan Respýblıkasy Prezıdenttigine kandıdat Amangeldi Taspıhovtyń tirkelgeni týraly habarlama jarııalansyn», delingen OSK qaýlysynda.
Budan ári Ortalyq saılaý komıssııasynyń músheleri qaýly jobasyna daýys berip, qujat biraýyzdan qabyldandy. Osydan keıin OSK tóraǵasy Berik Imashev prezıdenttikke kandıdat Amangeldi Taspıhovqa tıisti kýálikti tabys etti.