Brıfıngte Máýlen Áshimbaev Ortalyq saılaý komıssııasynyń sheshiminen keıin Qazaqstan Prezıdentiniń kezekten tys saılaýyna Nur Otan partııasynan kandıdat Qasym-Jomart Kemeluly Toqaevtyń Respýblıkalyq qoǵamdyq shtaby qurylǵanyn aıtyp, ony basqarýdy Qasym-Jomart Kemeluly ózine júktegenin málimdedi.
Respýblıkalyq qoǵamdyq shtabtyń quramyna: Halyq Qaharmandary: Muhtar Altynbaev, Baqytjan Ertaev, Qazaqstannyń Eńbek Erleri: Ivan Saýer, Aıman Musaqojaeva, Serik Aqsholaqov, Iýrıı Pıa, Memleket jáne qoǵam qaıratkerleri: Kenjeǵalı Saǵadıev, Ádil Ahmetov, Sansyzbaı Esilov, Baqytjan Jumaǵulov, halyqaralyq sporttyq saıystarda elimizdiń atyn shyǵaryp, abyroıymyzdy asqaqtatqan sportshylarymyz: Jaqsylyq Úshkempirov, Aleksandr Vınokýrov, Aıbek Nuǵymarov, Zúlfııa Ǵabıdýllına, Álııa Júsipova, Qanat Islam jáne Dınara Sádýaqasova, úkimettik emes uıymdardyń ókilderi Arýjan Saın, Dınara Sháıjúnisova, Dınara Zákıeva, belgili óner qaıratkerleri: Roza Rymbaeva, Dosxan Joljaqsynov, Altynaı Jorabaeva, Maıra Muxamedqyzy, Samal Eslıamova, Sáken Maıǵazıev, Qydyráli Bolmanov, Tamara Asar syndy ánshiler men ártister, al jýrnalısterdiń arasynan Darxan Qydyráli, Nurtóre Júsip, Dana Nurjigit, Maııa Bekbaeva, Qalqaman Sarın sııaqty qalamgerler múshe boldy. Sondaı-aq Respýblıkalyq shtabtyń quramynda Parlament depýtattary da bar.
Respýblıkalyq qoǵamdyq shtabtyń basshysy alǵash ret qoǵamdyq shtabtyń TeamQazaqstan jastar qanaty da qurylǵanyn aıtty. Osy rette Respýblıkalyq qoǵamdyq shtabtyń quramyndaǵy 187 adamnyń 33-i jastar qanatynyń ókilderi ekenin aıta ketken jón.Jıynda búginde elimiz boıynsha 227 qoǵamdyq shtab qurylǵany aıtyldy. Onyń 17-si – oblystyq, 37-si – qalalyq jáne 173-i aýdandyq deńgeıde jumys isteıdi. Aımaqtyq jáne aýmaqtyq shtabtardyń quramyna 5766 adam ense, onyń 1267-si jastar qanatynyń ókilderi.
M.Áshimbaev atalǵan shtabtar músheleriniń bári Nur Otan partııasynan Qazaqstan Prezıdenttigine kandıdattyń senim bildirilgen ókilderi ekenin erekshe atap ótti.
– Elimiz boıynsha Qasym-Jomart Kemelulynyń 19 500-den astam senim bildirilgen adamy tirkeldi, – dedi Respýblıkalyq qoǵamdyq shtabtyń basshysy. Sondaı-aq ol óz sózinde barlyq shtabta kandıdattyń qoǵamdyq qabyldaý bólmesi jumys isteıtinin, onda azamattardyń ótinishteri men usynystary qabyldanatynyn jetkizdi. Odan bólek, Respýblıkalyq qoǵamdyq shtabtyń músheleri 13 mamyrdan bastap barlyq óńirge shyǵyp, halyqpen kezdesetinine nazar aýdardy.M.Áshimbaev partııa Tóraǵasynyń tapsyrmasyna sáıkes saılaýaldy úgit-nasıhat jumystaryn joǵary deńgeıde, kreatıvti, tıimdi, zamanaýı tehnologııalardy qoldanyp nátıjeli ótkizýge daıyn ekenin jetkizdi.
– Elbasy, partııamyzdyń Tóraǵasy Nursultan Ábishuly Nazarbaev pen Memleket basshysy Qasym-Jomart Kemeluly Toqaevtyń tapsyrmasy boıynsha bul saılaý ádil ári ashyq, Qazaqstan Respýblıkasynyń zańdaryna sáıkes, halyqaralyq normalarǵa saı, joǵary deńgeıde ótýi kerek. Partııamyz saılaýdyń ashyq ári ádil ótýi úshin barlyq sharany júzege asyrady. Ol úshin biz Ortalyq saılaý komıssııasymen, otandyq jáne halyqaralyq baıqaýshylarmen, sondaı-aq buqaralyq aqparat quraldarymen tyǵyz jumys isteýge daıynbyz, – dedi M.Áshimbaev.
Sóziniń sońynda ol elimizdiń iri saıası naýqannyń aldynda turǵanyn aıtyp, bul barsha qazaqstandyqtar úshin jaýapkershilik ekenin tilge tıek etti.
Is-shara barysynda Respýblıkalyq qoǵamdyq shtabtyń músheleri: belgili qoǵam qaıratkeri, «Ulttyq ǵylymı medısınalyq ortalyq» AQ basqarma tóraǵasy Abaı Baıgenjın, «Atameken» UKP basqarma tóraǵasy, Nur Otan partııasy Saıası keńesiniń múshesi Abylaı Myrzahmetov, qoǵam qaıratkeri, qaıyrymdylyq qorynyń dırektory Arýjan Saın jáne «Qazaqstan» ulttyq telearnasynyń júrgizýshisi, bloger Áıgerim Esenáli sóz sóılep, aldaǵy saıası naýqanǵa tas-túıin daıyn ekenderin jetkizdi.