Kókparshylar aýyldyń atyn shyǵarady

– Bul shara Qazaqstannyń Tuńǵysh Prezıdenti Nursultan Nazarbaevtyń «Uly dalanyń jeti qyry» baǵdarlamalyq ma­qa­lasy men Jastar jylyna oraı­­lastyrylyp otyr. Aýy­ly­myz­dyń aýyzbirshiligi osyndaı or­taq isterde kórinedi. Osy tus­ta Jyltyrda týyp-ósip, bú­ginde jyraqta júrgen azamat­­tardyń da kómegin aıta ketýi­miz kerek, – dep barsha aýyl­das­­taryna alǵysyn bildirdi Shal­qar aýyldyq okrý­giniń ákimi Qar­jaý­baı Qaljan. 

Osy mereıli sáttiń meımany bolǵan Aýdaryspaq fede­ra­sııa­synyń prezıdenti, ulttyq at sportynyń janashyry Danııar Qobylandın: «Úlken qala­lar men keıbir oblys orta­lyq­ta­ryn­da at sportynan bolmaǵan sharalar Shalqardyń shaǵyn aýylynda júzege asyp jatatynyn kórip, marqaıyp qalamyz. Bú­gingi basqosýdyń máni zor, maqsaty – ulttyq bolmysymyzben únde­se­di», – dep aqjarma tile­gin bil­dir­di. Bul sózdi aýdan­dyq deneshynyqtyrý jáne sport bóli­mi­niń basshysy Sultan Jumanov ta qýat­­tap, ulttyq sportqa den qo­ıyp jatqan aýyl jigitterine rıza­­­shylyǵyn bildirdi. 

Kóp uzamaı sahnadan kókpar koman­dasy endi «Álim ata» bolyp atalatyndyǵy resmı jarııa­lan­dy. 

Aýyldyń ardagerler uıy­my­nyń tóraǵasy Orynbasar Ju­­baev, aýyl aqsaqaly Ýaıs Ahmet: «Álim ata — qazaq halqyn qu­ra­ǵan beldi taıpalardyń biri. Shejire boıynsha Kishi júz qura­my­na enedi. Endi kúlli qazaq eli­ne ortaq babamyzdyń esimin alyp júrý kókparshylarymyzǵa úlken jaýapkershilik júkteıdi», – dep olarǵa zor senim artyp, batalaryn berdi. 

Jańa esimdi ıelengen kókpar komandasynyń qurmetine oraı kók­par, aýdaryspaq, jamby atý, alaman, qunan báıge, qoshqar kóterýden saıystar ótti. Alaman báıgeden I oryndy Móńke bı aýyldyq okrýginen kelgen Nurbek Berimbetovtiń tulpary ıelendi, jyltyrlyq Jol­dymurat Jubaev qosqan sáı­gúlik qunan báıgeden birinshi kel­di. Qoshqar kóterýden osy aýyldyń Maǵjan Isaǵalı esimdi jigiti alǵashqy orynǵa shyqty. Júl­degerlerdiń barlyǵy uıymdastyrýshylar tarapynan syı-sııapattar aldy. 

– Qazirdiń ózinde oblys aty­nan shyǵyp, atalǵan sport túr­le­rinen elimizdiń túkpir-túk­pi­rinde ótetin dodalarǵa qa­ty­­syp júrgen aýyl jigitteri bar. Danııar Meırambek esim­di aýyldasymyz jaqynda kók­par­dan respýblıkalyq ashyq bi­rin­shi­likke qatysatyn komandanyń irik­teý quramynda bolyp, Taraz qa­lasynda 20 kún ázirlikten ótip qaıtty. Búginde ol atalǵan ko­man­danyń rezer­vinde tur. Son­­daı-aq Altaı Súıeýbaı es­im­di azamat aýdarys­paqtan sport sheberi atandy. Qa­nybek Jansúgirov, Danııar Meı­ram­bek esimdi jigitterimiz aýda­rys­­paqtan sport sheberligine úmit­ker. 

Osy sharanyń ótýine aýy­ly­myzdyń barsha jastary bel­sendi boldy. 1968 men 1997 jyl­dary aralyǵynda týǵan jyl­tyr­lyq azamattar búgingi sharaǵa demeý­­shilik jasady, – deıdi Jyl­tyr aýyldyq okrýgi ákimi appara­tynyń jetekshi mamany Mu­rat­bek Úbnııazov. 

  Muhtar MYRZALIN Aqtóbe oblysy, Shalqar aýdany, Jyltyr aýyly