Uıymdastyrýshylardyń aıtýynsha, bıylǵy plenarlyq otyrys «Jahan(syz)daný: álem damýdyń jańa úlgisin izdeýde», «Tutyný daǵdarysy», «Mass-medıanyń sıfrlyq shynaıylyǵy: synaqty qabyldaı alamyz ba?», «AI dáýiri: adamzattyń quldyraýy, álde gúldenýi?», «Senim daǵdarysy. Kúshterdiń jahandyq bólinisi», «Blogerler: vırtýaldyq álemniń jańa rok-juldyzdary ma?», «Zańsyz-zańdy: marıhýana - qoljetimdi!» taqyryptarynda uıymdastyrylady.
Sondaı-aq jıyn barysynda «Ortalyq Azııadaǵy aımaqtyq ıntegrasııa» taqyrybynda dóńgelek ústel ótedi. Onda Ortalyq Azııa elderiniń jańa birlestiginiń bolashaǵyna sarapshy kózqaras bildiriledi.
Forýmǵa 19 elden sheteldik spıkerler, elimizdiń memleket qaıratkerleri men aıtýly sarapshylary qatysady dep kútilýde. Basqosýǵa AQSh, Kanada, Ulybrıtanııa, Avstralııa, Germanııa, Reseı, Grýzııa, Polsha, Ýkraına, Avstrııa, Qytaı, Estonııa, Slovenııa, Sent-Vınsent jáne Grenadın, Lıvan, Andorra, Naırobı, OAR, BAÁ ókilderi qatysady.
Atap aıtsaq, spıkerler qatarynda eston saıasatkeri Hendrık Ilves, Ortalyq barlaý basqarmasynyń basshysy (1993-1995 jj), qýatty saqtaý boıynsha sarapshy, Genie Energy Ltd. strategııalyq keńesshisi, Siva Power, Inc. Dırektorlar keńesiniń múshesi Robert Djeıms Výlsı, kongressmen Ýeın Kertıs Ýeldon, Reseıdegi Facebook, Instagram jáne Messenger aımaqtyq dırektory Anna-Marııa Treneva, Fýtýrıst jáne «Máshıneler kóterilisi», «Zertteý avtorlary - jasandy aqyl-oıdy jasaýshylardyń shyndyǵy» kitaptarynyń avtory Martın Ford, jýrnalıst, TASS bas dırektorynyń birinshi orynbasary Mıhaıl Gýsman, jýrnalıst, «Gordon býlvary» gazetiniń bas redaktory, «GORDON» ınternet-basylymynyń negizin salýshy Dmıtrıı Gordon, táýelsiz jýrnalıst jáne «Ilves International» bas dırektory Andres Ilves, CGTN baǵdarlamasynyń avtory jáne júrgizýshisi Stıven Koýl.
Forým aıasynda medıa saladaǵy kásibı taqyryptar, atap aıtqanda, jýrnalıstıkanyń sıfrlyq dúınedegi keleshegi men blogjúıe yqpalynyń kúsheıýi sóz etiledi.
Eýrazııa Medıa Forýmynyń basty maqsaty – Ortalyq Azııadaǵy jetekshi ári táýelsiz dıalog alańy retinde Qazaqstan, Eýrazııa jáne búkil halyqaralyq qaýymdastyqty tolǵandyratyn geosaıası, ekonomıkalyq, áleýmettik-mádenı damý máseleleri boıynsha saıasatkerler, jýrnalıster men sarapshylardyń pikirtalasyna jaǵdaı jasaý.