Búgin, 7 mamyr kúni Atyraý oblystyq IID dástúr boıynsha Otan qorǵaýshylar kúni merekesine oraı saltanatty shara ótkizdi. Sharaǵa QR Parlament májilisiniń depýtattary Baqtyqoja Izmuxambetov jáne Abaı Tasbolatov, Atyraý oblysynyń ákimi Nurlan Noǵaev, IIQ basshylyǵy, jeke quram, ishki ister qyzmetiniń ardagerleri men qaza tapqan polısııa qyzmetkerleriniń otbasy qatysty.
QR Prezıdenti Qasym-Jomart Toqaevtyń buıryǵymen, qyzmettik mindetterin atqarý kezinde qaza tapqan serjant Shalqar Aqymǵalıevqa 3 dárejeli «Aıbyn» ordeni berildi. Ordendi polısııa qyzmetkeriniń anasyna oblys basshysy Nurlan Noǵaev tabystady.
-Búgin biz azamattardyń qaýipsizdigin, olardyń beıbit ómir súrý jáne jumys isteý quqyǵyn qorǵaıtyndardy qurmetteımiz. Tótenshe jaǵdaıda quqyq qorǵaý organdary kez kelgen ýaqytta adamdarǵa kómekke keledi. Sizderdiń tıimdi, kásibı deńgeılerińizdiń nátıjesinde qylmystar anyqtalyp, tynyshtyq saqtalýda. Kezekshilik mindetin atqarǵan kezde jıi ózińniń ómirińdi táýekel etýge týra keledi. Erlik pen qaharmandyq úshin qaza tapqan polıseıler Asqar Bısekenov, Shalqar Aqymǵalıev, Nurbergen О́temisuly memlekettik nagradalarmen marapattaldy. Ata-analarǵa bizdiń elimizdiń laıyqty azamattaryn tárbıeleýde alǵys aıtamyz. Qyzmettik boryshtaryn atqarý kezinde erlikpen qaza tapqandar esimi otandastar esinde máńgi qalady,- deıdi Nurlan Noǵaev.
Ishki ister mınıstrliginiń polısııa general-leıtenanty Erlan Turǵymbaevtyń atynan quqyq qorǵaý organdarynyń birqatar qyzmetkeri quqyq qorǵaý organdarynyń laýazymdy tulǵalaryna arnalǵan «Quqyq tártibin qamtamasyz etý» medalimen, Qurmet gramotalary jáne alǵys hattarmen marapattaldy.
Arnaıy polısııa general-leıtenanty shenin Atyraý oblystyq IID-niń polısııa polkovnıgi Aıan Dúısembaev aldy.
- Biz qaza bolǵan polısııa qyzmetkerlerin qurmetpen eske alamyz. Olardyń batyrlyq áreketi árdaıym kúndelikti qylmyspen kúresken polısııa qyzmetkerleri úshin erlik pen patrıotızmniń úlgisi bolady, - dedi Aıan Dúısembaev.
Qazaqstan Respýblıkasy Parlamenti Májilisiniń depýtattary Baqtyqoja Izmuhambetov pen Abaı Tasbolatov ardagerlerge jáne qazirgi polısııa qyzmetkerlerine alǵys bildirip, qaıtys bolǵan polısııa qyzmetkerleriniń otbasylary men dostaryna zor densaýlyq pen baqyt tiledi.
Marapattaý rásiminen keıin is-shara erlikpen qaza tapqan Asqar Bısekenov, Shalqar Aqymǵalıev jáne Nurbergen О́temisovke arnalǵan memorıaldy eskertkish taqtanyń ashylýyna ulasty.
Mılısııa maıory Asqar Bısekenov 1993 jyly 18 sáýirde qaıtys boldy. Buryn sottalǵandar toby «Atyraý-Erkinqala» tas jolyna polısııa qyzmetkerin alyp shyǵyp, uryp, birneshe ret pyshaq jaraqatyn salǵan.
Nurbergen О́temisov 2009 jyly 30 qarashada kóz jumdy. Mas júrgizýshi jol polısııasynyń qyzmetkerin qaǵyp ketken. Tańerteń erte Avangard aýdanynda polıseı kúdikti Mersedesti toqtatýǵa tyrysyp, óz ómirin qıdy. III dárejeli «Aıbyn» ordenimen marapattalǵan.
2019 jyldyń 21 naýryzynda patrýl polısııasynyń serjanty Shalqar Aqymǵalıev sýǵa batyp bara jatqan áıeldi qutqarýǵa tyrysyp, muzdy sýǵa batyp ketti. Alaıda, kúshti aǵymdy jeńe almaı, polısııa sýǵa ketti. Kópirden sekirgen qyzdy onyń áriptesi Rýstembek Súndetov sýdan shyǵarǵan.
Qatysýshylar qaza tapqan polısııa qyzmetkerleri eskertkishterine gúl shoqtaryn qoıyp, bir mınýt únsizdikpen eske aldy.