8 maýsymda AQSh-tyń Nıý-Iork qalasyndaǵy áıgili «Madison Square Garden» arenasynda Qazaqstannyń áıgili kásipqoı boksshysy Gennadıı Golovkınniń áli eshkimnen jeńilmegen kanadalyq Stıv Rollspen kúsh synasatyny belgili.
Osy keshte sharshy alańǵa shyǵatyn elimizdiń taǵy bir óreni – Álı Ahmedovtyń kimmen judyryqtasatyny belgili boldy. Ekinshi orta salmaqtaǵy jerlesimiz tájirıbeli Abraham Hanmen aıqasady. 34 jastaǵy AQSh-tyń ókili 2007 jyldan beri kásipqoı rıngte óner kórsetýde. Sol aralyqta 31 kezdesý ótkizip, 26 ret jeńiske jetti. 16 qarsylasyn aıqyn basymdyqpen utty. 4 ret utylyp, taǵy bir básekede teń esep tirkeldi. Han UBF nusqasy boıynsha altyn belbeýdiń ıegeri.
Sondaı-aq, Nıý-Iorktegi boks keshinde Gennadıı Golovkın men Álı Ahmedovten bólek, Qazaqstannyń taǵy bir dańqty bylǵary qolǵap sheberi Danııar Eleýsinov te óner kórsetedi.