Basty maqsatymyz – saıası naýqannyń zań talaptaryna saı ótýin qamtamasyz etý. 11 mamyrdan bastalatyn saılaýaldy úgit-nasıhat jumystaryna belsene kirisetin bolamyz. Kandıdatty qoldaýǵa 10 myńnan astam qol jınalyp, 26 sáýirde aıaqtalǵanyn aıta ketkim keledi, dedi sóıleskenimizde prezıdenttikkke úmitker Qasym-Jomart Toqaevty qoldaý jónindegi aımaqtaǵy qoǵamdyq shtabtyń jetekshisi Vladımır Býbenko.
Onyń aıtýynsha, Nur Otan partııasy qalalyq, aýdandyq fılıaldarynyń senimdi ókilderi qajetti ázirlikterden ótken. Shtabtyń quramyna oblystyń qurmetti azamaty Qudaıbergen Qalıev, «Zenchenko jáne K» komandıttik seriktestiginiń bas dırektory, oblystyq máslıhattyń depýtaty Gennadıı Zenchenko, partııa ardageri Ivan Chırkalın, kásipqoı bokstan álem chempıony Janat Jaqııanov sekildi tanymal tulǵalar tartylǵan. Barlyǵy 200-den astam belsendi jumyldyrylǵan. Sáýirdiń 15-i men maýsymnyń 7-si aralyǵyn qamtıtyn keshendi jumys kestesi túzilip, eńbek ujymdarymen kezdesýler, túrli aksııalar men forýmdar ótkizý belgilengen. 1300-den astam nurotandyqtar saılaýaldy úgit-nasıhat júrgizý sharalaryna aralasyp, barlyq saılaý ýchaskelerin baratyn bolady.
«Elbasynyń strategııalyq baǵyty jalǵasyp, áleýmettik baǵdarlamalar dáıektilikpen oryndalyp keledi. Men ár soltústikqazaqstandyqtyń azamattyq belsendilik tanytýyna shaqyramyn. Adal, ashyq, ádil saılaý ótkizý – óz qolymyzda», deıdi el azamaty Qudaıbergen Qalıuly.
Búginde oblysta 600-den asa saılaý ýchaskesi qurylǵan.
О́ńir jurtshylyǵyna aldaǵy saılaý barysyn qoǵamdyq qadaǵalaýǵa negizdelgen «Amanat» azamattyq tuǵyrnamasy da tanystyryldy. Arnaıy top músheleri eńbek ujymdarynda kezdesýler ótkizip, quqyq, ádildik pen ashyqtyqty qamtamasyz etý, yntymaqtastyq jáne daıyndyq sharalaryn ortaǵa saldy. «Amanat» qazaqstandyqtardyń táýelsiz erikti birlestigi sanalady. Saılaýdyń negizgi bes baǵyty boıynsha monıtorıng júrgiziledi. Básekelestiktiń teń bolýy, eshkimge artyqshylyq berilmeýi, aqparattardyń, saılaý ýchaskeleriniń qoljetimdiligi basty nazarǵa alynady, degen «Qyzyljar» bilim ortalyǵynyń jetekshisi Janat Muhamedjanov saılaý ótetin ár ýchaskede uıym atynan bir adam ókildik etetinin jetkizdi. Komanda quramyna jýrnalıster, sarapshylar, qoǵamdyq uıym ókilderi iriktelip, oqý trenıngteri uıymdastyrylmaq.
Saılaý barysyn qadaǵalaýǵa jergilikti zań konsýltanttary táýelsiz palatasynyń basqarma tóraǵasy Evgenıı Kınsel de atsalysqaly otyr.
Soltústik Qazaqstan oblysy