Bul týyndy – qan maıdanda sheıit bolǵan bozdaqtardyń rýhyna, tyldaǵy halyqtyń eren eńbegine jasalǵan taǵzym.
Qoıylymda tyldaǵy halyqtyń soǵys jyldaryndaǵy shekken beıneti, jaýdy jeńýge qosqan úlesi baıandaıdy. Maıdandaǵy jaýyngerlerdiń basynan ótken oqıǵalar da sýretteledi. Rekvıemniń soǵys taqyrybyna arnalǵan shyǵarmalardan basty ereksheligi, munda qostanaılyq maıdangerlerdiń aty-jóni, olar týraly shynaıy derekter paıdalanylǵan. Bul búginde teatrdyń ádebıet bóliminiń meńgerýshisi Abylaı Maýdannyń kúrdeli janrda qoıylyp otyrǵan alǵashqy týyndysy. Rejısseri – teatrdyń kórkemdik jetekshisi Álııa Baımahan.
Qoıylym barysynda qaharly jyldary týǵan, halyqqa rýh berip, úmit syılaǵan, kóńilin demdegen ánder jandy daýyspen shyrqaldy. Ártisterdiń ánshilik qabileti, olardyń daýys úılesimi de kórermenderdi erekshe tánti etti.
"Rekvıem kórermenge túrli oı saldy. Tarıhı málimetterdi molynan qamtyǵan. Jandy daýysta shyrqalǵan ánder júrek tebirentti. Sondyqtan, Jeńis kúnine arnalǵan bul qoıylymdy teatr ártisterinen qurylǵan kameralyq hordyń resmı ashylýy dep esepteımin. Árıne, áý demeıtin qazaq joq, biraq, ózderińiz baıqaǵan shyǵarsyzdar, bizdiń trýppamyz shetinen ánshi…" dedi Oblystyq mádenıet basqarmasynyń basshysy Erlan Qalmaqov.
«Teatr janynan hor ashýǵa Mádenıet basqarmasynyń qoldaýymen ótken jyldyń sońyna taman talaptanǵan edik. Álııa Baımahan qoıǵan «Ánim sen ediń» spektakli sol nıetimizge degen alǵashqy qadam boldy. Mýzyka mamany Saltanat Jaqaevanyń ázirleýimen hor repertýary únemi tolyǵýmen keledi. Bul baǵyttaǵy izdenisti jumystarymyz áli de jalǵasyn taba beredi» deıdi Abylaı Maýdan.