Taıaýda Qazaqstan Sýretshiler odaǵynyń múshesi, Táýelsiz «Tarlan» syılyǵynyń laýreaty, Kórkemóner akademııasynyń akademıgi Asqar Esenbaevtyń «Izdenis ýaqyty» atty kórmesin tamashalaýdyń sáti túsken edi. Sheber tiliniń tylsym qudireti ózine eriksiz baýraıdy. Ekspozısııa músindik portretter men sımvolıkalyq portretterdi, grafıkalyq jumystardy, bárin qosqanda ár jyldarda sheberdiń qolynan shyqqan toqsannan astam týyndyny qamtyǵan.
«Adamnyń kózi úshin erekshe konfıgýrasııalarda jan men oıdyń fantastıkalyq múmkindigin óziniń oǵash denesimen sendiretin basqa jaratylystardyń tańǵajaıyp obrazdaryn jasaı alatyndyǵynyń arqasynda avtorǵa ekspressııa men gıperbola tili jaqynyraq. Qarapaıym ǵana músindik kólemder ómirdiń tragedııalyq mánin bere alatyn bolsa, onda mınımalızmniń tili Esenbaevqa táýeldi boldy deı berińiz», deıdi óner ıesiniń qoltańbasy haqynda ónertanýshy Baıan Barmanqulova.
Asqar Esenbaevtyń shyǵarmashylyq joly 80-jyldardyń ortasynda bastaldy. Kórmeden músinshiniń óz ýaqytynda ónersúıer qaýymnan joǵary baǵa alǵan «Kitaphanashy Lıýsıa», «Vıktor» syndy tanymal týyndylaryn kezdestirýge bolady. Sonymen qatar ekspozısııada Memlekettik óner mýzeıi qorynan alynǵan avtordyń 1985 jyly oryndaǵan ózderiniń páktigimen jáne qorǵansyzdyǵymen adam janyn tebirentetin ul bala men qyz balanyń músinderi beınelengen «Balalar» dep atalatyn kompozısııasy da usynylǵan. Isa paıǵambardyń «Sender ‒ meniń dostarymsyńdar» degen sózimen atalǵan shyǵarmasy Isa paıǵambar men onyń rýhanı kemeldikke umtylǵan on eki shákirtiniń jumyla, ekpindi ári senimdi adymdaǵan shebinen turady. Kúmis jaǵylǵan granıtten jasalyp, mıf pen dinniń qupııa keńistigi arasynda saltanat qurǵan adamzat tarıhyna qoıylǵan basty eskertkishterge arnalǵan obektiler toptamasy da qyzyǵýshylyq týdyrady. San qyrly músinderge kóńil qoısańyz, óziniń sımvolıkalyq mánderiniń qarapaıymdyǵymen jáne kúrdeliligimen kóz tartatyn kóne zamandardyń keıpine engendeı kúı keshesiz.
A.Esenbaevtyń jumystary Á.Qasteev atyndaǵy Memlekettik óner mýzeıiniń qorynda, Memlekettik Tretıakov galereıasynda, sondaı-aq AQSh, Italııa, Germanııa, Fransııa jáne Reseı elderiniń jeke kolleksııalarynda saqtaýly.
ALMATY