Islam qarjy ortalyǵyn qurýdyń negizinde ıslamdyq qarjy jáne qazirgi zamanǵy qarjylyq tehnologııalar salasynda mamandar daıarlaý jónindegi bastamalardy qolǵa alý kózdelgen. Oqý baǵdarlamalary ıslamdyq qarjy salasyndaǵy kóshbasshy Hamad Bın Halıfa ýnıversıtetimen birlese ázirlenip, «Astana» halyqaralyq qarjy ortalyǵynyń qoldaýymen naqty sektor talaptaryna saı beıimdelgen.
Ýnıversıtettegi qarjy ortalyǵynyń ashylý saltanaty ál-Farabı atyndaǵy QazUÝ-diń rektory, akademık Ǵalymqaıyr Mutanov pen Hamad Bın Halıfa ýnıversıtetiniń prezıdenti Ahmad M.Hasnanyń resmı túrde lenta qııýynan bastaldy. Rektor Ǵ.Mutanov birneshe taraptyń yntymaqtastyǵy nátıjesinde esigin ashyp otyrǵan áleýeti joǵary ortalyq postkeńestik deńgeıdegi aýqymdy nysan bolǵandyqtan el ómirindegi aıtýly oqıǵa retinde qabyldaýǵa tolyq negiz bar ekenin erekshe atap ótti. Akademıktiń aıtýynsha, iri qarjy ortalyqtary tek elimizde ǵana emes, álemniń ózinde qadaý-qadaý. Álemdik reıtıngte oń nátıjesin kórsetip otyrǵan «Astana» qarjy ortalyǵynyń qarqyndy damýynan keıin onyń halyqaralyq mártebesin álemdik deńgeıge kóterý úshin jan-jaqty qoldaý qajettiligi týdy. Ýnıversıtette ashylyp otyrǵan jańa ortalyq mamandar daıarlap, sol qoldaýdy ǵylymı jaǵynan da, salalyq baǵytta da jetildire túsý úshin jumys istemek. On jyl buryn bastalǵan ázirlik jumystarynyń negizinde dúnıege kelgen ortalyqtyń strategııalyq mańyzy asa zor. Qarjylyq bırja ortalyǵy qyzmetin qosa atqaratyn iri ortalyq qajetti zamanaýı sandyq tehnologııalarmen jan-jaqty jabdyqtalǵan. Osy múmkindigine oraı ál-Farabı atyndaǵy QazUÝ ıslamdyq qarjylandyrý aıasyndaǵy bilimdi ulttyq deńgeıde jáne búkil Ortalyq Azııa aımaǵyna da mýltıplıkasııalaýdy maqsat etip otyr. QazUÝ negizinde ıslamdyq qarjy boıynsha teorııalyq jáne tájirıbelik qarjylyq saýattylyqty arttyrýǵa, ıslamdyq bank sektoryn jandandyrýǵa, sondaı-aq ıslamdyq baǵaly qaǵazdar bırjasynyń sýbektiler sanynyń ósýine yqpal etedi. Bul jerde ǵylymı jáne qarjylyq máselege baılanysty barlyq is-sharalardy ótkizý josparlanǵan. Jıynǵa qatysqan qonaqtar Qazaqstan ekonomıkasy men bıznesi úshin qyzmet etetin keleshegi kemel ortalyqtyń álemdik deńgeıde tanylǵan Katardaǵy Hamad Bın Halıfa ýnıversıtetimen jáne «Astana» qarjy ortalyǵymen birlesken jumysy saıası jaǵynan da, ekonomıkalyq turǵydan da tıimdiligin tanytyp, úlken iske jol ashatynyna senim bildirdi.