Qaraǵandy oblystyq Qazaqstan halqy Assambleıasynyń bastamasymen dúnıege kelgen klýbtyń az ǵana ýaqyt ishinde turǵyndar arasynda tanymaldyǵy artyp, memlekettik tildi meńgerýge nıet bildirgen túrli etnos ókilderiniń zor qyzyǵýshylyǵyn týdyryp otyr dep senimmen aıtýǵa bolady.
Bul jerge kelip, tildi meńgergýge den qoıǵan jandardyń deńgeıi ártúrli: olardyń arasynda stýdentter de, zeınetkerler de, bıznesmender de, keńse qyzmetkerleri de bar.
Til úıretý barysynda belgili ǵalym Qanat Tásibekovtiń «Sıtýatıvnyı kazahskıı» atty ádistemelik quraly basshylyqqa alyndy. Avtor áý basta óziniń ana tilin bilmegen. Ýaqyt óte kele sana-sezimi oıanyp, qazaq tilin óz betinshe úırenedi de, osy kitapty jazyp shyǵady. Keıinnen óziniń avtorlyq ádistemesin oılap taýyp, ony klýbtaǵy dáristerinde paıdalana bastaǵan. Atalǵan ádisteme ulttyq mentalıtettiń erekshelikteri, tarıhı faktiler, folklorlyq uǵymdar, qazaq halqynyń qundylyqtar júıesi arqyly tildi meılinshe jeńil ári jetik oqýǵa múmkindik beredi.
Sonymen qatar, klýbtyń árbir otyrysyna esimderi elge tanys qoǵam qaıratkerlerin, zııaly qaýym ókilderin shaqyrý ádemi dástúrge aınalyp keledi. Alǵashqy kezdesýdiń spıkeri retinde polıglot, Nur-Sultan qalasyndaǵy «Mámile-Ten» klýbynyń uıymdastyrýshysy Vladıslav Ten shaqyrylǵan bolatyn. Sondaı-aq, «Nátıje» kompanııasynyń basshysy Erlan Áshim, SBTC tilder mektebiniń negizin qalaýshy Sergeı Zorın, qoǵam qaıratkeri Baqytqalı Musabekov syndy til janashyrlary da kelip qatysyp, óz oılaryn ortaǵa saldy.
Munda kelýshilerge suhbat klýby nesimen unaıdy degenge kelsek, eń aldymen bul jerdegi dáris dostyq jáne beıresmı jaǵdaıda órbıdi. Sonan soń, klýbta oıyn formattary jıi qoldanylady. Ekinshiden, talqylaýǵa arnalǵan qyzyqty jáne ózekti taqyryptar, sáıkesinshe paıdaly sóz tirkesteri men sóıleý aınalymdaryn qoldaný til úırenýshilerdi birden ózine úıirip áketedi. Úshinshiden, bul – tájirbıe. Sabaq barysynda ártúrli ıntonasııalardy, qarym-qatynas mánerin qabyldaýǵa úırenip, aýyzeki sóılesýge múmkindik bar. О́zge etnostardyń qazaq dástúrlerin úırený arqyly ultymyzdyń mol murasymen tanysýǵa tolyqqandy jaǵdaı jasalǵan.
Sonymen qatar, atalǵan klýb qarym-qatynas negizinde, oıyn túrlerin qoldana otyryp, qazaq ánderin jattaýǵa jáne kúndelikti turmysta qoldanatyn dıalogtarǵa basa nazar aýdarady.
Kenshiler astanasyndaǵy «Dostyq úıinde» ornalasqan «Mámile» suhbat klýbyndaǵy kezdesýlerdiń ár apta saıyn ótetinin jáne onyń tegin ekenin de aıta ketken jón.