QR Bilim jáne ǵylym mınıstrligi men Qyzdar ýnıversıtetiniń uıytqy bolýymen alǵash ret uıymdastyrylǵan jármeńke pedagogıkalyq mamandyqtar boıynsha bilim alǵan túlekterdi jumyspen qamtýǵa arnalǵan. Bastama jastarǵa búginde bilim berý oshaqtarynda qaı sala mamandaryna suranys kóp nemese tapshy ekendigin jáne eńbek ótilinsiz jumysqa ornalasýǵa bolatyndyǵyn anyqtaýǵa septesedi. Sondaı-aq shara «dıplommen – jumysqa» josparyn júzege asyrýǵa múmkindik bermek. Joǵary jáne orta arnaýly oqý oryndary, qalalyq, aýdandyq bilim basqarmalary, jalpy bilim berý uıymdary men Nazarbaev zııatkerlik mektepteriniń qyzmetkerleri qatysqan jıyndy Qazaq ulttyq qyzdar pedagogıkalyq ýnıversıtetiniń Strategııalyq damý jáne halyqaralyq baılanystar jónindegi prorektory Lázzat Bólebaeva ashyp, ustazdar daıarlaıtyn oqý ornynyń bitirýshi túlekterin jumyspen qamtý oraıynda ótkizilip otyrǵan sharanyń máni men mańyzyna keńinen toqtaldy.
– Jármeńke otandyq pedagogıkalyq joǵary oqý oryndarynyń biryńǵaı qazaqstandyq bilim berý keńistigin qalyptastyrý, jastardy jumysqa ornalastyrý máselesi boıynsha ortaq dıalog alańyn qurý, olarǵa jumysqa ornalasý múmkindikteri týraly aqparat berý jáne túlekterdi turaqty jumyspen qamtýǵa járdemdesý maqsatynda uıymdastyrylyp otyr. Búginde pedagogıkalyq mamandyqtar boıynsha bos jumys oryndary jármeńkesi jastar arasynda jumyssyzdyq máselesin ońtaıly sheshýdiń tıimdi tetigi bolyp tabylady, – dedi Lázzat Bólebaeva.
Al Oqý jáne oqý ádistemelik jumystar jónindegi prorektor Qaırat Júnis Qyzdar ýnıversıtetiniń qol jetkizgen jetistikteri jaıynda sóz qozǵap, bilim ordasy men jumys berýshiler arasyndaǵy baılanysqa nazar aýdardy.
– 2018 jylǵy Akkredıtteý jáne reıtıngtiń táýelsizdik agenttigi qorytyndysy boıynsha Qazaqstannyń úzdik 20 joǵary oqý ornynyń jalpy reıtınginde ýnıversıtet 7 oryndy ıelense, «Bilim berý» baǵytyndaǵy mamandardy daıarlaý boıynsha 2015 jyly 1-orynǵa, 2016, 2017, 2018 jyldary 2 orynǵa qol jetkizdi. Ýnıversıtet naryq suranysyn eskere otyryp, bilim baǵdarlamalarynyń mazmunyn jańartý maqsatynda jumys berýshilermen, Nazarbaev ýnıversıteti, Nazarbaev zııatkerlik mektepterimen jáne jalpy orta bilim berý mekemelerimen tyǵyz baılanysta jumys isteıdi. Jyl saıyn bilim berý baǵdarlamasy boıynsha arnaıy jumys toby qurylyp, ár jańa oqý jylyna jumys berýshilerdiń, stýdentterdiń suranysy boıynsha oqý baǵdarlamalary 30 paıyzǵa jańartylyp otyrady, – dedi Qaırat Júnis.
Jármeńkede jumys berýshiler óz mekemelerindegi bos jumys oryndaryn usyndy. Stýdentter bul múmkindikti paıdalanyp túıindemelerin joldady. Sondaı-aq bilim, ǵylym, óner jáne sporttaǵy jetistikteri jaıly arnaıy portfolıolar kórmesin ótkizip, prezentasııa jasady.
– Bos jumys oryndar jármeńkesin uıymdastyrý jas mamandarǵa ǵana emes, jumys berýshiler úshin de mańyzdy. Jastar ózderin qyzyqtyratyn bos oryndar týraly málimet alýǵa, al bizder úshin túlekterdiń iskerlik qasıetin baǵalaýǵa múmkindik týdyrady. Máselen, Atyraý oblysyna fızıka, defektologııa, ınformatıka, orys tili men ádebıeti pánderiniń muǵalimderi qajet. Osy taqilettes sharalar arqyly túlekterge aqparat bere alamyz. Orta mektepke qyzmetke ornalasqan jas mamanǵa tájirıbesi mol ustazdar baǵyt-baǵdar berip, jumysynyń qyr-syryn tereń meńgerýine árqashan qolushyn kórsetedi. Sondyqtan jastar jumys isteýge degen ynta-yqylas tanytsa, biz óz tarapymyzdan árdaıym qoldaý kórsetýge daıynbyz, – deıdi Atyraý oblystyq bilim basqarmasynyń basshysy Jansulý Tóremuratova.
Joǵary oqý ornyna deıingi bilim berý men mansap bóliminiń aqparatyna súıener bolsaq, jármeńke pedagogıkalyq, gýmanıtarlyq, jaratylystaný jáne óner salasynda mamandar daıarlaýdyń jekelegen baǵyttary boıynsha uıymdastyryldy. Shara aıasynda «Eńbek naryǵyndaǵy suranys jáne áleýetti jumys berýshilermen yntymaqtastyq» taqyrybynda da jıyn ótti. Alqaly basqosýda joǵary oqý oryndarynyń ókilderi men jumys berýshiler túlekterdi jumyspen qamtýdyń máselesin talqylap, ózara kelisim jasady. Sondaı-aq «Head hunter» kompanııasynyń ókilderi taqyryp týrasynda jáne mansapty qurý maqsatynda arnaıy sheberlik synybyn júrgizdi.
Statıstıkalyq málimetter boıynsha, ótken oqý jylynda ýnıversıtetti 1548 stýdent támámdap, olardyń 95 paıyzy jumysqa ornalasqan. Al 2017 jyly «eki qolǵa bir kúrek tapqandardyń» úles salmaǵy 88 paıyzdy quraıdy.