Onyń ashylý saltanatyna belgili akademık Kenjeǵalı Saǵadıev, senator, ǵalym Baqytjan Jumaǵulov jáne ǵalymnyń otbasy, týystary, stýdentter, oqytýshylar qatysty. Ýnıversıtet prorektory Gúlvıra Musabekova ǵalym atyndaǵy stýdentter dárishanasynyń ashylýy bilim ordasy stýdentteri úshin aıyryqsha oqıǵa ekenin aıta otyryp, ǵalymnyń ǵylymı qyzmetine toqtalyp ótti. Onyń bilim qýǵan ár stýdent ómirine temirqazyq etip alatyn úlgi ekenin basa aıtty.
«О́mirzaq Sultanǵazın álemdik matematıka ǵylymynyń damýyna úles qosty. Ǵylymnyń joly – qııa jol, ol aýyr eńbektiń nátıjesi ekeni jurtqa aıan. О́mirzaq Mahmutuly qazaq mektebin bitirdi,orys tilimen qatar, aǵylshyn tilin óz betimen úırenip, sol arqyly óziniń matematıka, fızıka ǵylymdaryndaǵy eńbegin dúnıejúzilik ǵalymdar qaýymdastyǵyna alyp shyqty. Egemen elimizdiń erteńi ǵylymmen, bilimmen tyǵyz baılanysty. Bizdiń Qostanaı memlekettik pedagogıkalyq ýnıversıteti bilimdi mamandar daıyndaıdy. О́mirzaq Sultanǵazın esiminiń bizdiń bilim ordamyzǵa berilýi zańdy dep bilemiz. Onyń ómiri men ǵylymdaǵy qyzmeti bizdiń stýdentterge tamasha úlgi. Ǵalymnyń esimin alǵaly ýnıversıtette kóptegen jumystar atqaryldy» dedi Gúlvıra Aıdarbekqyzy.
Ǵalymnyń jubaıy Raıhan Ǵanıqyzy bergen materıaldar, sırek sýretter arqyly ýnıversıtet stýdentteri О́mirzaq Sultanǵazın týraly vıdeomaterıaldar, kórneki materıaldar jasady. Onyń ómirimen, qyzmetimen tereń tanysty. Saltanatta tarıh ǵylymdarynyń doktory, professor Amanjol Kúzembaıuly, ǵalymnyń jubaıy Raıhan Ǵanıqyzy, taǵy basqalar da sóz alyp, estelikter aıtty. Barlyǵynyń pikiri eńbekterin álem matematıkteri moıyndaǵan iri ǵalymnyń dárishanasy stýdent jastar úshin qasıetti mekendeı oryn bolýy tıis degen oıǵa toǵysty.
Ǵalym atyndaǵy jańa dárishananyń ashylýyna halqymyzdyń dástúrimen shashý shashyldy, ónerli stýdentter qýanyshty jyrmen jetkizdi.
Qostanaı